బంగాళాఖాతంలో ఏర్పడిన బుల్బుల్ తుపాను.. భారత్-బంగ్లాదేశ్పై తీవ్ర ప్రభావం చూపుతోంది. సాగర్ ద్వీపానికి సమీపంలోని భారత్ - బంగ్లా సరిహద్దులోని మడ అడవుల్లో తీరం దాటింది తుపాను. ఇప్పటికే బంగాల్, ఒడిశాల్లో ఈదురు గాలులు విజృంభిస్తున్నాయి.
రెండు దేశాలపై పంజా విసురుతున్న 'బుల్బుల్' భయంకర హరికేన్లకు రెండింతలుగా బుల్బుల్ ప్రభావం ఉంటుందని అమెరికా వాతావరణ శాఖ పేర్కొంది. ఎలాంటి పరిస్థితినైనా ఎదుర్కొనేందుకు బంగాల్ ప్రభుత్వం సిద్ధంగా ఉందని ఆ రాష్ట్ర అధికారులు వెల్లడించారు.
భారీ వర్షాల ధాటికి చెట్లు విరిగి పడడం వల్ల రవాణా వ్యవస్థ స్థంభించిపోతోంది. కొన్ని చోట్ల మనుషుల మీద పడి ప్రాణాలు బలి చేస్తున్నాయి. ఇలాంటి ఘటనల్లో బంగాల్ రాష్ట్ర వ్యాప్తంగా నలుగురు మృత్యువాత పడ్డారు.
దీదీకి మోదీ భరోసా..
బంగాల్లో పరిస్థితిపై ప్రధాని నరేంద్రమోదీ సమీక్షించారు. ఆ రాష్ట్ర ముఖ్యమంత్రి మమత బెనర్జీతో సంభాషించిన ఆయన విపత్తు నుంచి బయటపడేందుకు కేంద్రం పూర్తి సహకారం అందిస్తుందని హామీ ఇచ్చారు.
బంగ్లాను వణికిస్తోన్న తుపాను..
బంగ్లాదేశ్లో గంటకు 120 కి.మీ వేగంతో గాలులు వీస్తున్నాయి. తుపాను బంగ్లా భూభాగంలో ప్రవేశించగానే.. తీరప్రాంతాలు సుమారు 1 నుంచి 2 మీటర్ల మేర మునిగిపోతాయని వాతావరణ శాఖ అంచనా వేస్తోంది.
బంగ్లాదేశ్లో బుల్బుల్ తుపాను నేపథ్యంలో ఆ దేశ ప్రభుత్వం అప్రత్తమైంది. తుపాను ప్రభావిత ప్రాంత ప్రజలను కాపాడుకునేందుకు ముందస్తు చర్యలు చేపడుతోంది. 5 వేలకుపైగా పాఠశాల భవనాలు, మసీదులను పునరావాస కేంద్రాలుగా వినియోగించనున్నారు. శనివారం సాయంత్రం వరకు సుమారు 18 లక్షల మందిని సురక్షిత కేంద్రాలకు తరలించారని విపత్తు నిర్వహణ శాఖ మంత్రి రెహమాన్ తెలిపారు. కొన్ని గ్రామాల్లో సురక్షిత ప్రాంతాలకు తరలివెళ్లాలని లౌడ్స్పీకర్ల ద్వారా ప్రకటనలు చేశారు అధికారులు. నౌకాశ్రాయల్లో అన్నీ కార్యకలాపాలను నిలిపివేసింది ప్రభుత్వం.
ఇదీ చూడండి:వేగంగా బాబ్రీ కేసు విచారణ... త్వరలో తీర్పు వెలువడే అవకాశం!
