పాఠశాలలు తెరిచేందుకు విద్యాశాఖ మార్గదర్శకాలు

పాఠశాలలను తెరిచేందుకు మార్గదర్శకాలను విడుదల చేసింది కేంద్రం. ఈ నెల 15 తర్వాత స్కూళ్లు, విద్యాసంస్థలను తెరవచ్చని స్పష్టం చేసింది. అయితే ఇందుకు సంబంధించిన ఎస్​ఓపీలను రూపొందించడం కోసం రాష్ట్రాలు, కేంద్ర పాలిత ప్రాంతాలకు అధికారాలిచ్చింది.

అక్టోబరు 15 తర్వాత పాఠశాలలను తెరిచేందుకు మార్గదర్శకాలను విడుదల చేసింది కేంద్ర విద్యాశాఖ. దశల వారీగా స్కూళ్లు తెరవాలని స్పష్టం చేసింది. విద్యార్థుల ఆరోగ్యం, భద్రతను దృష్టిలో పెట్టుకుని.. స్థానిక అవసరాల మేరకు ఎస్​ఓపీ(స్టాండర్డ్​ ఆపరేటింగ్​ ప్రొసీజర్​)ను రూపొందించే అధికారాలను రాష్ట్రాలకు, కేంద్ర పాలిత ప్రాంతాలకు అప్పజెప్పింది.

అయితే విద్యార్థుల హాజరుపై కొంత వెసులుబాటు కల్పించాలని విద్యాశాఖ పేర్కొంది. స్కూళ్లు తెరుచుకున్న 2-3 వారాల వరకు ఎలాంటి అసెస్​మెంట్లు ఉండకూడదని స్పష్టం చేసింది.

ఇప్పటివరకు ఆన్​లైన్​లో విద్యను అభ్యసించిన విద్యార్థులు.. ఇప్పుడు పాఠశాలలకు చేరుకునే ప్రక్రియ వీలనైంత సులభంగా ఉండాలని విద్యాశాఖ వెల్లడించింది.

ఇదీ చూడండి:-కరోనా వేళ విద్యా రుణం ఇలా ఈజీగా!