కేంద్ర మంత్రి పదవికి అరవింద్​ సావంత్​ రాజీనామా!

మహారాష్ట్రలో ప్రభుత్వ ఏర్పాటుపై శివసేనను గవర్నర్​ ఆహ్వానించిన నేపథ్యంలో కీలక పరిణామం చోటు చేసుకుంది. కేంద్ర భారీ పరిశ్రమల శాఖ మంత్రి పదవికి రాజీనామా చేస్తున్నట్లు ప్రకటించారు శివసేన ఎంపీ అరవింద్​ సావంత్​. నేడు ఉదయం 11 గంటలకు అధికారికంగా ప్రకటించనున్నట్లు వెల్లడించారు.

మహారాష్ట్రలో రాజకీయ పరిణామాలు క్షణక్షణం ఉత్కంఠ రేపుతున్నాయి. ప్రభుత్వం ఏర్పాటు చేయాలని గవర్నర్ భగత్​సింగ్​ కోషియారీ.. శివసేనను ఆహ్వానించిన నేపథ్యంలో కీలక పరిణామాలు చోటు చేసుకుంటున్నాయి. ఆ పార్టీ ఎంపీ, కేంద్ర భారీ పరిశ్రమల శాఖ మంత్రి అరవింద్​ సావంత్​ కీలక నిర్ణయం తీసుకున్నారు. కేంద్ర మంత్రి పదవికి రాజీనామా చేస్తున్నట్లు ప్రకటించారు. ఈ మేరకు ఉదయం 11 గంటలకు అధికారికంగా ప్రకటించనున్నట్లు వెల్లడించారు. ఈ నిర్ణయంతో ఎన్డీఏ కూటమి నుంచిశివసేన బయటకొచ్చేసినట్టేనని రాజకీయ వర్గాలు అంటున్నాయి.

ప్రభుత్వ ఏర్పాటులో శివసేనకు మద్దతు ఇవ్వాలంటే ముందుగా ఎన్డీఏ కూటమి నుంచి ఆ పార్టీ తప్పుకోవాలని స్పష్టం చేసింది ఎన్​సీపీ. అలాగే కేంద్ర ప్రభుత్వంలోని అన్ని పదవులకూ సేన నాయకులు రాజీనామా చేయాలని పేర్కొంది. ఎన్​సీపీ తాజా ప్రతిపాదనకు శివసేన కూడా సుముఖంగా ఉన్నట్లు తెలుస్తోంది. ఈ క్రమంలో అరవింద్​ సావంత్​ రాజీనామా ప్రాధాన్యం సంతరించుకుంది.

ఇదీ చూడండి: శివసేన కోర్టులోనే 'మహా' బంతి