షా భరోసాతో నిరసనలు విరమించిన ఐఎంఏ

వైద్యులు, వైద్య సిబ్బందిపై దాడులకు వ్యతిరేకంగా పిలుపునిచ్చిన నిరసనల్ని ఐఎంఏ విరమించుకుంది. దేశవ్యాప్తంగా వైద్య సిబ్బందికి రక్షణ కల్పిస్తామని కేంద్ర హోంమంత్రి అమిత్​షా భరోసా ఇచ్చిన నేపథ్యంలో ఈ నిర్ణయం తీసుకుంది.

కరోనా మహమ్మారిపై ముందుండి పోరాడుతున్న వైద్యులు, వైద్య సిబ్బంది రక్షణకు పూర్తి స్థాయి చర్యలు తీసుకుంటామని భరోసా ఇచ్చారు కేంద్ర హోంమంత్రి అమిత్​షా. ప్రాణాలను లెక్క చేయకుండా రోగులకు చికిత్స అందిస్తున్నప్పటికీ.. కొన్నిచోట్ల వైద్యులపై దాడులు జరిగిన నేపథ్యంలో ఈ వ్యాఖ్యలు చేశారు.

ఇండియన్​ మెడికల్​ అసోసియేషన్(ఐఎంఏ)​ ప్రతినిధులు, పలువురు వైద్యులతో వీడియో కాన్ఫరెన్స్​లో మాట్లాడారు కేంద్ర మంత్రి. కరోనా మహమ్మారిని కట్టడి చేసేందుకు విశేష కృషి చేస్తున్న వైద్యులకు, వైద్య బృందానికి అభినందనలు తెలియజేశారు. ప్రభుత్వం వారికి అండగా ఉంటుందని భరోసాను ఇచ్చారు.

వైద్యులు, వైద్య సిబ్బందిపై దాడులకు నిరసనగా తలపెట్టిన ఆందోళన కార్యక్రమాలను విరమించుకోవాలని ఐఎంఏ ప్రతినిధుల్ని కోరారు అమిత్​షా. కాసేపటికే అందుకు అంగీకరిస్తూ ప్రకటన చేశారు ఐఎంఏ ప్రతినిధులు.