అప్పటివరకు ప్లాస్మా థెరపీ వద్దు: కేంద్రం

కరోనా చికిత్సకు ఉపయోగిస్తున్న ప్లాస్మా థెరపీ.. ఇంకా ప్రయోగదశలోనే ఉందని కేంద్రం స్పష్టం చేసింది. ఈ పద్ధతి కొవిడ్​ చికిత్సకు ఉపయోగపడుతుందని ఎలాంటి ఆధారాల్లేవని వెల్లడించింది. కొవిడ్​ బాధితుల్లో ఇప్పటివరకు 23.3 శాతం కోలుకున్నట్లు పేర్కొన్నారు ఆరోగ్య శాఖ సంయుక్త కార్యదర్శి లవ్​ అగర్వాల్​. 24 గంటల్లో 684 మంది కోలుకున్నట్లు తెలిపారు.

దేశవ్యాప్తంగా గడిచిన 24 గంటల్లో 684 మంది కరోనా బాధితులు కోలుకున్నట్లు స్పష్టం చేసింది కేంద్ర ఆరోగ్య మంత్రిత్వ శాఖ. దేశంలో ప్రస్తుతం రికవరీ రేటు 23.3 శాతంగా ఉన్నట్లు వెల్లడించారు ఆరోగ్య శాఖ సంయుక్త కార్యదర్శి లవ్​ అగర్వాల్​.

ప్లాస్మా చికిత్సపై..

ప్రస్తుతం కొవిడ్​ చికిత్సలో ఉపయోగిస్తున్న ప్లాస్మా థెరపీ ఇంకా ప్రయోగాత్మక దశలోనే ఉందన్న అగర్వాల్​.. ఈ పద్ధతి కరోనా నివారణకు ఉపయోగపడుతుందని ఎలాంటి ఆధారాల్లేవన్నారు. జాతీయ స్థాయిలో ఐసీఎంఆర్​ దీనిపై అధ్యయనం చేస్తున్నట్లు వెల్లడించారు. ఇది ఆమోదం పొందేవరకు ప్లాస్మా పద్ధతిని వాడొద్దని స్పష్టం చేశారు.

ట్రయల్ పద్ధతిలో లేదా పరిశోధనల కోసమే వినియోగించాలని పేర్కొన్నారు.​ ప్లాస్మా చికిత్సను సరైన పద్ధతిలో వాడకపోతే రోగి ప్రాణానికే ప్రమాదమని తెలిపారు.

అక్కడ కేసుల్లేవ్​...

గత 28 రోజులుగా 17 జిల్లాల్లో ఎలాంటి కరోనా కేసులు నమోదుకాలేదని ఆరోగ్య శాఖ అధికారులు పేర్కొన్నారు.

కరోనా వ్యాప్తి దృష్ట్యా దేశవ్యాప్తంగా కేంద్ర బృందాలు పర్యటిస్తున్నట్లు హోం శాఖ సంయుక్త కార్యదర్శి శ్రీవాత్సవ పేర్కొన్నారు. సూరత్​లో విస్తృతంగా పరీక్షలు నిర్వహిస్తున్నట్లు వెల్లడించారు. అక్కడ ఇంటింటి సర్వేలు చేసి కేసులు గుర్తించినట్లు తెలిపిన ఆమె... కాంటాక్ట్​ కేసుల జాడ కనుగొనేందుకు సాంకేతికతను వినియోగిస్తున్నట్లు వివరించారు.