'సీబీఎస్​ఈ సిలబస్​పై ఆ ప్రచారం తగదు'

సీబీఎస్​ఈ సిలబస్ నుంచి ప్రజాస్వామ్యం, బహుళత్వం, పౌరసత్వం, జాతీయవాదం, లౌకికవాదం లాంటి పలు అంశాలను తొలగించడంపై వెల్లువెత్తుతున్న విమర్శలపై కేంద్ర మానవ వనరులశాఖ మంత్రి రమేశ్ పోఖ్రియాల్ స్పందించారు. కరోనా నేపథ్యంలోనే సిలబస్ తగ్గించామని.. ఈ అంశాన్ని తప్పుగా చిత్రీకరించవద్దని విజ్ఞప్తి చేశారు.

సీబీఎస్​ఈ సిలబస్​లో కొన్ని కీలక అంశాలను తొలగించడంపై విమర్శలను కేంద్ర మానవ వనరులశాఖ మంత్రి రమేశ్ పోఖ్రియాల్ తిప్పికొట్టారు. కరోనా నేపథ్యంలో కొన్ని పాఠ్యాంశాలను తగ్గించామని, దీన్ని తప్పుగా చిత్రీకరించడం తగదని హితవు పలికారు.

ఓ ప్రత్యేక భావజాలాన్ని ప్రచారం చేయడం కోసమే... ప్రజాస్వామ్యం, బహుళత్వం, పౌరసత్వం, జాతీయవాదం, లౌకికవాదం సహా పలు అంశాలను తొలగించారని పలువురు విద్యావేత్తలు విమర్శలు గుప్పించారు. దీనిపై వివరణ ఇచ్చే ప్రయత్నం చేశారు రమేశ్ పోఖ్రియాల్.

ఈ సంవత్సరానికే...

పాఠ్యాంశాల తగ్గింపు ఈ విద్యా సంవత్సరానికే వర్తిస్తుందని... వచ్చే ఏడాది నుంచి పూర్తి సిలబస్ యథావిధిగా ఉంటుందని రమేశ్ పోఖ్రియాల్ స్పష్టం చేశారు. కరోనా నేపథ్యంలో విద్యార్థులపై ఒత్తిడి తగ్గించేందుకు 30 శాతం మేర సిలబస్​ను తగ్గించామని ఆయన పేర్కొన్నారు.

విద్యారంగానికి చెందిన నిపుణులు, విద్యావేత్తల సూచనల మేరకే ఈ నిర్ణయం తీసుకున్నట్లు పేర్కొన్న పోఖ్రియాల్... ఈ విద్యను రాజకీయాలతో ముడిపెట్టవద్దని విజ్ఞప్తి చేశారు.