పాఠశాలలకూ 'కరోనా'- నొయిడాలో అర్ధంతరంగా సెలవులు

కరోనా భయాలతో దిల్లీ రాజధాని ప్రాంతంలోని నొయిడాలో రెండు ప్రైవేటు పాఠశాలలను మూసేశారు అధికారులు. ఓ విద్యార్థి తండ్రికి ఈ మహమ్మారి వైరస్​ సోకినందున ముందు జాగ్రత్త చర్యగా ఈ నిర్ణయం తీసుకున్నారు. ఫ్రాన్స్​ రాజధాని పారిస్​లోనూ 120 పాఠశాలలకు సెలవులు ప్రకటించారు అధికారులు.

ప్రపంచాన్ని భయపెడుతున్న కరోనా వైరస్​.. విద్యార్థుల చదువులకూ ఆటంకంగా మారుతోంది. కొవిడ్​-19 భయాలతో నొయిడాలోని రెండు ప్రైవేటు పాఠశాలలను అర్ధంతరంగా మూసేసింది యాజమాన్యం. దిల్లీకి చెందిన ఓ విద్యార్థి తండ్రికి కరోనా సోకినట్లు వైద్య పరీక్షల్లో తేలినందున ముందు జాగ్రత్తగా ఈ నిర్ణయం తీసుకున్నారు. పాఠశాలలను కొన్నిరోజులు మూసేస్తున్నట్లు విద్యార్థుల తల్లిదండ్రులకు మెసేజ్​ ద్వారా సందేశం పంపినట్లు తెలిపారు. ఇంటర్నల్​ పరీక్షలు కూడా వాయిదా వేసిన్నట్లు ఈ ఉదయమే స్పష్టం చేశారు. అయితే బోర్డు ఎగ్జామ్స్​ షెడ్యూల్​లో మాత్రం ఎలాంటి మార్పు ఉండదని చెప్పారు.

కరోనా సోకిన వ్యక్తి కుమార్తె చదువుతున్న పాఠశాలకు మార్చి 4 నుంచి 6 వరకు సెలవులు ప్రకటించారు. మరో పాఠశాలకు నేటి నుంచి ఈ నెల 9వ తేదీ వరకు సెలవులు ఇచ్చారు.

కరోనా సోకిన వ్యక్తి కుమార్తె పుట్టినరోజు వేడుక గతవారం జరిగింది. ఆ బర్త్​డే పార్టీకి వెళ్లినవారిలో ఎంతమందికి కరోనా సోకి ఉంటుందోనని అధికారులు భయపడుతున్నారు. కొవిడ్​-19 బారిన పడిన వ్యక్తి కుటుంబ సభ్యులను పరీక్షల నిమిత్తం సఫ్దార్​జంగ్​ ఆసుపత్రికి తరలించారు.

ఫ్రాన్స్​లోనూ ఇదే పరిస్థితి

ఫ్రాన్స్​లో ఇప్పటివరకు 191 మంది కరోనా బారిన పడ్డారు. ఈ నేపథ్యంలో​ రాజధాని నగరం పారిస్​లో 120 పాఠశాలలను మూసేశారు అధికారులు. ఫలితంగా ఓఐసీ ప్రాంతంలో దాదాపు 35,000 మంది విద్యార్థులు ఇళ్లకే పరిమితమయ్యారు. మరో 9,000 మంది విద్యార్థుల చదువులపైనా కొవిడ్​ ప్రభావం పడనుంది.