భగభగ మండే ఎండలో ఓ ఎడ్ల బండి. అందులో గంపెడు సామాను. ఆ బండి వెనుకాలే ఓ మహిళ, ఇద్దరు చిన్నారులు. అప్పటికే వందల కిలోమీటర్లు ప్రయాణించినట్టున్నారు. ఎద్దులు బండి నడుపుతుండగా వీరేంటీ ఇంత కష్టపడి నడుస్తున్నారని ముందుకెళ్లి చూస్తే.. ఎద్దులు లేవు. వాటి స్థానంలో ఇద్దరు అన్నదమ్ములున్నారు. అవును, లాక్డౌన్ వేళ భారమైన బతుకు బండిని ఓ కుటుంబానికి చెందిన వలస సోదరులు ఇలా మోస్తూ మహారాష్ట్రలో ఈటీవీ భారత్ కంటపడ్డారు.
సునీల్ అనే ఓ వలస కార్మికుడి కుటుంబం ఉజ్జయిన్ నినోరాలో జీవనం సాగిస్తోంది. వలస కార్మికులు అయినందున వీరికి అక్కడ సొంతిల్లు కూడా లేదు.. పైగా సునీల్ కుటుంబంలో కొద్ది రోజుల క్రితం విషాదం చోటుచేసుకుంది. సునీల్ సోదరి, సోదరుడు ఇద్దరూ కిడ్నీ సమస్యతో మరణించారు. చిన్నప్పుడే తండ్రిని కోల్పోయిన సునీల్.. ఆ పరిస్థితిని ఎలా అధిగమించాలో తెలీక సతమతమయ్యాడు. ఏళ్లుగా పెంచుకుంటున్న రెండు ఎద్దులను కేవలం రూ.18 వేలకు అమ్మేసి ఆ డబ్బుతో ఇద్దరి అంత్యక్రియలు నిర్వహించాడు. ఇక నినోరాలో జీవనోపాధి కరవైనందున వేరే గ్రామానికి వలస వెళదామని నిర్ణయించుకుంది సునీల్ కుటుంబం. అందుకే తమ సామగ్రిని ఎడ్ల బండిపై ఉంచి కుటుంబం మొత్తం.. పాదయాత్ర చేస్తున్నారు. ఇక బండిని లాగేందుకు ఎద్దులు కూడా లేనందున సోదరులిద్దరూ జోడెడ్లుగా మారి బతుకు బండిని లాగుతున్నారు. ఏదైనా గ్రామంలో స్థిరపడదామనుకుంటే కరోనా భయంతో ఏ ఒక్కరూ వారికి ఆశ్రయం కల్పించడం లేదు. తల్లి, ఇద్దరు తమ్ముళ్లు, ఓ చెల్లిని వెంటబెట్టుకుని కొత్త జీవితం ఆశతో పయనమయ్యాడు సునీల్.