పూర్తి జీతాలు ఎలా ఇస్తారు?: కేంద్రానికి సుప్రీం ప్రశ్న

ప్రైవేటు ఉద్యోగులకు కంపెనీలు.. మొత్తం జీతాలు అందించాలన్న కేంద్రం ఆదేశాలకు వ్యతిరేకంగా దాఖలైన వ్యాజ్యాలపై సుప్రీంకోర్టు విచారణ చేపట్టింది. ఈ వ్యవహారాన్ని అత్యవసర అంశంగా పరిగణించాలని ప్రభుత్వానికి తెలిపింది అత్యున్నత న్యాయస్థానం. విచారణను వచ్చే వారానికి వాయిదా వేసింది.

లాక్​డౌన్​లోనూ ప్రైవేటు సంస్థలు తమ ఉద్యోగులకు పూర్తి వేతనాలు చెల్లించాలన్న సర్కారు ఆదేశాలకు వ్యతిరేకంగా దాఖలైన వ్యాజ్యలను అత్యవసర అంశంగా పరిగణించాలని కేంద్రానికి తెలిపింది సుప్రీంకోర్టు. మార్చి 29న విడుదల చేసిన ఈ నోటిఫికేషన్​.. అనేకమందిపై ప్రభావం చూపుతోందని పేర్కొంది.

ఈ పిటిషన్లపై వీడియో కాన్ఫరెన్స్​ ద్వారా విచారణ చేపట్టింది జస్టిస్​ అశోక్​ భూషణ్​ ధర్మాసనం. వ్యాజ్యాలపై స్పందించాలని ప్రభుత్వానికి స్పష్టం చేసి.. వచ్చే వారానికి విచారణను వాయిదా వేసింది సర్వోన్నత న్యాయస్థానం.

కేంద్ర హోంశాఖ (మార్చి 29) ఆదేశాల స్థానంలో ఈ నెల 17న కేంద్రం మరో నోటిఫికేషన్​ను విడుదల చేసిందని అటార్నీ జనరల్​ కేకే వేణుగోపాల్​ అత్యుత్తమ న్యాయస్థానానికి తెలిపారు.

ఈ వ్యవహారాన్ని ఇప్పటికే ఈ నెల 15న విచారించింది సుప్రీంకోర్టు. లాక్​డౌన్​ వల్ల పని చేయని సంస్థలు.. తమ ఉద్యోగులకు పూర్తి స్థాయి జీతాలు అందించాలని ఆదేశాలివ్వడం వల్ల అనేక ప్రశ్నలు ఉత్పన్నమయ్యాయని సుప్రీం అభిప్రాయపడింది. వాటికి కేంద్రం సమాధానం చెప్పాలని స్పష్టం చేసింది. లాక్​డౌన్​ కారణంగా చిన్న పరిశ్రమలు నడవలేకపోతుంటే.. ఇక సిబ్బందికి పూర్తి జీతాలు ఎలా ఇస్తాయని ప్రశ్నించింది. ప్రభుత్వం సహాయం చేయకపోతే.. ఈ పరిశ్రమలు తమ ఉద్యోగులకు జీతాలు చెల్లించలేవని అభిప్రాయపడింది.

ఎలాంటి అంశాలను పట్టించుకోకుండా, యజమానుల ఆర్థిక చిక్కులపై చర్చించకుండా.. కేంద్రం ఈ ఆదేశాలను జారీ చేసిందని సూక్ష్మ, చిన్న, మధ్య తరహా పరిశ్రమల (ఎమ్​ఎస్​ఎమ్​ఈ) అసోసియేషన్​ తన వ్యాజ్యంలో పేర్కొంది. పూర్తిస్థాయి జీతాలు అందిస్తే.. సంస్థను మూసుకోవాలని, దీని వల్ల మొత్తానికే ఉద్యోగం కోల్పోయే ప్రమాదం ఉందని చిన్న పరిశ్రమలు చెబుతున్నాయి.