భద్రతా బలగాల పంజా- లష్కరే కీలక ఉగ్రవాది హతం

లష్కరే తొయిబా ఉగ్రసంస్థలో కీలకంగా వ్యవహరిస్తున్న ఉగ్రవాది ఆసిఫ్​ను భద్రతా బలగాలు మట్టుబెట్టాయి. పక్కా సమాచారంతో గాలింపు చర్యలు చేపట్టిన భద్రతా బలగాలు.. ఆసిఫ్​ను హతమార్చాయి. ఈ ఘటనలో ఇద్దరు పోలీసు సిబ్బంది గాయపడ్డారు.

జమ్ముకశ్మీర్​లోని సోపోర్​లో కరుడుకట్టిన లష్కరే తోయిబా ఉగ్రవాది ఆసిఫ్​ను భద్రతా బలగాలు మట్టుబెట్టాయి. ఉగ్రసంస్థ కార్యకలాపాల్లో కీలకంగా వ్యవహరిస్తున్న ఆసిఫ్.. గత కొంతకాలంగా జమ్ము వాసులను భయభ్రాంతులకు గురిచేస్తున్నాడు.

పక్కా సమాచారంతో ఆసిఫ్​ను బుధవారం ఉదయం భద్రతా బలగాలు చుట్టుముట్టాయి. ఉగ్రవాదిని లొంగిపోమని ఆదేశించాయి. కానీ ఎదురుదాడికి దిగిన ఉగ్రవాది.. గ్రనేడ్లతో భద్రతా బలగాలపై దాడి చేశాడు. ఆసిఫ్​ చర్యను సమర్థంగా తిప్పికొట్టి.. అతడిని హతమార్చాయి బలగాలు. ఈ ఘటనలో ఇద్దరు పోలీసు సిబ్బంది గాయపడ్డారు.

నెలరోజులుగా సోపోర్​లో ఉగ్రకార్యకలాపాలను ఆసిఫ్​ జోరుగా సాగిస్తున్నాడని జమ్ముకశ్మీర్​ డీజీపీ దిల్​బగ్​ సింగ్​ తెలిపారు. పోస్టర్లు ముద్రించి స్థానికులను భయపెట్టాడని వివరించారు. దుకాణాలు తెరవకూడదని, రోజువారీ పనుల నుంచి దూరంగా ఉండాలని ఆసిఫ్​ బెదిరించినట్టు డీజీపీ తెలిపారు.

ఇదీ చూడండి:- 9/11 మారణహోమానికి 18 ఏళ్లు- వెంటాడుతున్న జ్ఞాపకాలు