అలా అయితే పాకిస్థాన్‌ వెళ్లిపోండి: పోలీస్ ఉన్నతాధికారి

పౌరసత్వ చట్టానికి వ్యతిరేకంగా నిరసన వ్యక్తం చేస్తోన్న ఆందోళనకారులను హెచ్చరిస్తూ ‘పాకిస్థాన్‌ వెళ్లిపోండి’ అని మేరఠ్​ ఎస్పీ చేసిన వ్యాఖ్యలు తీవ్ర వివాదాస్పదమయ్యాయి. తర్వాత ఆ ఎస్పీ వివరణ ఇచ్చుకున్నారు. అక్కడున్న కొందరు యువకులు పాకిస్థాన్‌ను అనుకూలంగా నినాదాలు చేశారని, అందుకే తాను అలా హెచ్చరించానని చెప్పుకొచ్చారు.

పౌరసత్వ చట్టానికి వ్యతిరేకంగా ఉత్తర్​ప్రదేశ్‌ మేరఠ్​లో డిసెంబరు 20న పెద్ద ఎత్తున ఆందోళనలు జరిగాయి. ఈ క్రమంలో పోలీసులు, ఆందోళనకారుల మధ్య ఘర్షణ జరిగి ఐదుగురు పౌరులు ప్రాణాలు కోల్పోయారు. అల్లర్ల సమయంలో మేరఠ్​ సూపరిండెంట్‌ ఆఫ్‌ పోలీస్‌ (సిటీ) అఖిలేశ్‌ నారాయణ్‌ సింగ్‌ నిరసనకారులను హెచ్చరిస్తున్న ఓ వీడియో తాజాగా వైరల్‌ అయ్యింది. అందులో అఖిలేశ్ మాట్లాడుతూ‌.. ‘మీకు ఈ దేశంలో ఉండాలని లేకపోతే పాకిస్థాన్‌కు వెళ్లిపోండి. ఇక్కడ ఉంటూ మరో దేశాన్ని పొగుడుతారా? ఇక్కడేదైనా జరిగితే దానికి మీరే బాధ్యులు’ అని హెచ్చరించినట్లుగా ఉంది. ఈ వ్యాఖ్యలపై విమర్శలు వెల్లువెత్తాయి.

ఈ నేపథ్యంలో సదరు వ్యాఖ్యలపై స్పందించారు ఎస్పీ అఖిలేశ్‌. '‘కొందరు యువకులు పాకిస్థాన్‌ను అనుకూలంగా నినాదాలు చేశారు. అందుకే నేను అలా మాట్లాడా. మీకు భారత్‌ అంటే ద్వేషముంటే పాకిస్థాన్‌ వెళ్లిపొమ్మని చెప్పా’' అని తెలిపారు.

మరోవైపు మేరఠ్​ ఏడీజీ ప్రశాంత్‌ కుమార్‌.. అఖిలేశ్‌ వ్యాఖ్యలను సమర్థించడం గమనార్హం.

'పరిస్థితులు సాధారణంగా ఉంటే పోలీసులు కూడా మంచిగానే మాట్లాడతారు. కానీ ఆ రోజు నిరసనకారులు విధ్వంసం సృష్టించారు. పోలీసులపైకి రాళ్లు విసిరారు. భారత్‌కు వ్యతిరేకంగా, పాక్‌కు అనుకూలంగా నినాదాలు చేశారు. పరిస్థితి తీవ్ర ఉద్రిక్తతకు దారితీసింది. అయినప్పటికీ మా అధికారులు చాలా నిగ్రహంగా వ్యవహరించారు. ఎవరిపైనా కాల్పులకు పాల్పడలేదు' అని చెప్పుకొచ్చారు.

ఇదీ చూడండి: భద్రతను ఛేదించి ప్రియాంకను కలిసిన వీరాభిమాని