బంగాల్​ సెమీ ఫైనల్​లో దీదీ క్లీన్ స్వీప్​- భాజపాకు షాక్

పశ్చిమ బంగలో మూడు అసెంబ్లీ స్థానాల ఉప ఎన్నికల్లో విజయకేతనం ఎగరేసింది అధికార తృణమూల్​ కాంగ్రెస్​ పార్టీ. కలియాగంజ్​, ఖరగ్​పుర్​, కరింపుర్​లో ప్రత్యర్థి భాజపా అభ్యర్థులపై భారీ మెజారిటీతో విజయం సాధించింది. ఎన్​ఆర్​సీ అమలుపై ఏర్పడిన గందరగోళమే భాజపా ఓటమికి కారణమని పార్టీ వర్గాలు పేర్కొన్నాయి.

పశ్చిమ బంగలో ఇటీవల జరిగిన మూడు అసెంబ్లీ స్థానాల ఉప ఎన్నికల్లో భాజపాకు గట్టి ఎదురుదెబ్బ తగిలింది. మూడు చోట్ల ప్రత్యర్థి పార్టీ అభ్యర్థులను చిత్తు చేస్తూ.. భారీ మెజారిటీతో క్లీన్​ స్వీప్​ చేసింది అధికార తృణమూల్ కాంగ్రెస్​.

భారీ మెజారిటీతో...

ఉప ఎన్నికల ఫలితాల్లో మొదట వెలువడిన కలియాగంజ్​ స్థానంలో టీఎంసీ తరఫున బరిలో నిలిచిన అభ్యర్థి తపన్​ దేవ్​ సిన్హా విజయం సాధించారు. భాజపా అభ్యర్థి కమల్​ చంద్ర సర్కార్​పై 2,418 ఓట్ల ఆధిక్యంతో గెలిచారు.

కరింపుర్​ స్థానంలో భాజపాపై సుమారు 24,073 ఓట్ల ఆధిక్యంతో టీఎంసీ అభ్యర్థి బిమలెందు సిన్హా గెలుపొందారు.

ఖరగ్​పుర్​ సరద్​ స్థానంలో భాజపా అభ్యర్థి ప్రదిప్​ సర్కార్​పై టీఎంసీ అభ్యర్థి ప్రేమచంద్ర ఝా సుమారు 20,788 ఓట్ల మెజారిటీతో విజయం సాధించారు.

భాజపా పట్టున్న స్థానాల్లోనూ..

సార్వత్రిక ఎన్నికల్లో భాజపా గెలుపొందిన రాయ్​గంజ్​ లోక్​సభ నియోజకవర్గ పరిధిలోనిదే కలియాగంజ్​. ఎంపీ స్థానాన్ని గెలుచుకున్నప్పటికీ.. ఉప ఎన్నికల్లో ఘోరంగా పరాజయం పాలైంది భాజపా. గతంలో ఈ సీటు కాంగ్రెస్​ చేతిలో ఉండేది.

ఖరగ్​పుర్​ సదర్​ స్థానంలో భాజపా రాష్ట్ర అధ్యక్షుడు దిలిప్​ ఘోష్​ ఎమ్మెల్యేగా చేశారు. ఆయన మెదినిపుర్​ స్థానం నుంచి లోక్​సభకు ఎన్నికవటం వల్ల ఖాళీ ఏర్పడింది. భాజపాకు కంచుకోటగా ఉన్న ఈ స్థానంలోనూ టీఎంసీ విజయం సాధించటం ఆ పార్టీకి మింగుడుపడని విషయం.

కరింపుర్​ ఎమ్మెల్యే, టీఎంసీ నేత మోహువా మిత్రా లోక్​సభకు ఎన్నికైన నేపథ్యంలో ఇక్కడ ఉప ఎన్నికలు వచ్చాయి. అయితే .. ఆ స్థానాన్ని తిరిగి దక్కించుకుంది టీఎంసీ.

భాజపా అహంకారానికి సరైన సమాధానం: మమత

"అహంకార ధోరణితో రాష్ట్ర ప్రజలను అవమానించే భాజపాకు ఎన్నికల ఫలితాలే సరైన సమాధానం" అని పేర్కొన్నారు బంగాల్​ ముఖ్యమంత్రి, టీఎంసీ అధినేత్రి మమతా బెనర్జీ. ఉప ఎన్నికల విజయాన్ని బంగాల్​ ప్రజలకు అంకితమిస్తున్నట్లు ప్రకటించారు. కాంగ్రెస్​, సీపీఎం తమ పార్టీలను బలపర్చుకోవాల్సింది పోయి.. భాజపాకు వంతపాడుతున్నాయని ఆరోపించారు.

ఎన్​ఆర్​సీపై గందరగోళంతోనే..

బంగాల్​లో ఎన్​ఆర్​సీని అమలు చేసే అంశంపై ఏర్పడిన గందరగోళం కారణంగానే భాజపా ఓటమి చెందిందని పార్టీ తరఫున పోటీ చేసిన ఓ అభ్యర్థి పేర్కొన్నారు. ఉప ఎన్నికల ఫలితాల ప్రభావం రాష్ట్ర రాజకీయాలపై ఉండదని విశ్లేషించారు. ఓటమిపై ఆత్మపరిశీలన చేసుకుంటామని తెలిపారు భాజపా బంగాల్​ అధ్యక్షుడు దిలీప్​ ఘోష్​. సాధారణంగా ఉప ఎన్నికల్లో అధికారంలో ఉన్నవారే గెలుస్తారని చెప్పారు.

ఇదీ చూడండి: బంగాల్​ బరి: సెమీఫైనల్​పై మోదీ, దీదీ గురి!