బంగ్లా పేరు కోసం మోదీకి తృణమూల్​ వినతి

పశ్చిమ్​ బంగ పేరును 'బంగ్లా'గా మార్చాలని ప్రధాని నరేంద్ర మోదీని తృణమూల్​ కాంగ్రెస్​ ప్రతినిధుల బృందం కలిసింది. ప్రస్తుత పార్లమెంటు సమావేశాల్లో ఈ మేరకు రాజ్యాంగ సవరణ బిల్లును తీసుకురావాలని బృందం కోరింది.

ప్రధానమంత్రి నరేంద్ర మోదీతో 12 మంది తృణమూల్ కాంగ్రెస్ ప్రతినిధుల బృందం​ బుధవారం సమావేశమయ్యారు. పశ్చిమ్​ బంగ పేరును ‘బంగ్లా’గా మార్చుతూ ప్రస్తుత పార్లమెంటు సమావేశాల్లో రాజ్యాంగ సవరణ బిల్లును తీసుకురావాలని మోదీని కోరారు.

ఈ మేరకు ప్రధాని మోదీకి వినతి పత్రం అందజేశారు టీఎంసీ నేతలు. ఇందుకు సంబంధించిన తీర్మానాన్ని బంగాల్​ శాసనసభ ఆమోదించిందని తెలిపారు.

1000 ఏళ్ల చరిత్ర

ఇదే అంశాన్ని టీఎంసీ ఎంపీ సుఖెందు శేఖర్‌ రాయ్‌ కూడా రాజ్యసభలో లేవనెత్తారు. భౌగోళికంగా దేశంలో ‘తూర్పు బంగాల్‌’ అనే ప్రాంతం ఎక్కడా లేనందున తమ రాష్ట్రానికి పశ్చిమ్​ బంగ అనే పేరు అనవసరమని, దాన్ని ‘బంగ్లా’గా మార్చాలని కోరారు. బంగ్లా అనేది బంగా అనే పదం నుంచి వచ్చిందని, ఇది వెయ్యేళ్ల క్రితం స్థిరపడ్డ ఓ ద్రవిడ తెగ పేరని వివరించారు.

బంగాల్​ పేరును ‘బంగ్లా’గా మార్చేందుకు 2018 జులైలో ఆ రాష్ట్ర శాసనసభ ఏకగ్రీవంగా ఆమోదం తెలిపింది. ఈ విషయంపై 2017 మార్చిలోనే విదేశీ వ్యవహారాల మంత్రిత్వ శాఖ స్పందించింది. పొరుగు దేశం పేరు బంగ్లాదేశ్ కావటం వల్ల దౌత్యపరమైన అయోమయం ఏర్పడుతుందని చెబుతూ అభ్యంతరం వ్యక్తం చేసింది.

అసహనంపై మోదీకి మమత లేఖ

దేశంలో అసహనం నానాటికి పెరిగిపోతోందని మోదీకి పలువురు ప్రముఖులు రాసిన లేఖపై బంగాల్​ సీఎం మమత బెనర్జీ స్పందించారు. మతపరమైన, విద్వేషపూరిత నేరాలు రోజురోజుకు పెరుగుతున్నాయని పేర్కొన్నారు.

ఇదీ చూడండి: మూకదాడులపై మోదీకి ప్రముఖుల లేఖ