నిర్భయ దోషులకు దిల్లీ కోర్టు డెత్ వారెంట్ జారీ చేసిన అనంతరం.. ఉరి శిక్ష అమలు ప్రక్రియను వేగవంతం చేశారు అధికారులు. ఈ నెల 22న ఉదయం 7 గంటలకు మరణ శిక్ష అమలు చేయాలని దిల్లీ కోర్టు మంగళవారం తీర్పు వెలువరించింది. అందులో భాగంగానే మరణ శిక్ష అమలుకు కసరత్తు మొదలైంది. ఉరి శిక్ష విధించేందుకు జైలు సిబ్బంది ట్రయల్స్ నిర్వహించనున్నట్లు తిహార్ జైలు అధికారులు వెల్లడించారు.
2013లో పార్లమెంటుపై దాడి దోషి అఫ్జల్‌ గురును ఉరి తీసిన జైలు నెంబర్ 3లోనే నిర్భయ దోషులకు మరణ శిక్ష అమలు చేయనున్నారు.
''రాబోయే రోజుల్లో దోషులకు ఉరి శిక్షపై ట్రయల్స్ నిర్వహిస్తాం. కానీ ఈ రోజు కాదు. మూడో నెంబర్ జైల్లో ఈ ప్రక్రియ జరుగుతుంది.''
- తిహార్ జైలు అధికారి
దోషులు ఎంత బరువు ఉంటారో అంత బరువు ఉండే వస్తువులను ఉపయోగించి ఉరి ట్రయల్స్ వేయనున్నారు. అయితే ఇవి ఎప్పుడు నిర్వహించేది మాత్రం అధికారులు తెలియజేయలేదు. ఈ డమ్మీ ప్రక్రియలో ప్రజా పనుల శాఖ అధికారులు, జైలు సూపరింటెండెంట్‌, ఇతర అధికారులు పాల్గొననున్నారు.