ఆందోళనలు చేసేవారిని కాల్చిపారేయాలి: భాజపా నేత

బంగాల్​ భాజపా అధ్యక్షుడు దిలీప్​ ఘోష్​ మరోసారి వివాదస్పద వ్యాఖ్యలు చేశారు. ఉత్తర్​ప్రదేశ్ తరహాలో  ప్రభుత్వ ఆస్తులను ధ్వంసం చేసేవారిని కాల్చిపారేయాలని వ్యాఖ్యానించారు. ఆస్తులకు నష్టం కలిగించేవారిపై దీదీ ప్రభుత్వం చర్యలు తీసుకోవడం లేదని మండిపడ్డారు.

బంగాల్ భాజపా అధ్యక్షుడు దిలీప్ ఘోష్ మరోసారి వివాదాస్పద వ్యాఖ్యలు చేశారు. ప్రభుత్వ ఆస్తులను ధ్వంసం చేసేవారిని ఉత్తర్​ప్రదేశ్ తరహాలో కాల్చిపారేయాలంటూ వ్యాఖ్యానించారు. నదియా జిల్లాలో ఆదివారం పర్యటించిన దిలీప్ ఘోష్ ఓ బహిరంగ సభలో మాట్లాడుతూ ఈ వ్యాఖ్యలు చేశారు.

బంగాల్‌లో పౌర చట్టానికి వ్యతిరేకంగా ఆందోళనలు ఉద్ధృతంగా సాగుతున్నాయి. డిసెంబర్‌లో కొంతమంది రైల్వే, ప్రజారవాణా ఆస్తులను ధ్వంసం చేశారు. ఈ నేపథ్యంలో... ప్రభుత్వ ఆస్తులకు నష్టం కలిగించేవారిపై దీదీ సర్కారు చర్యలు తీసుకోవడం లేదని ఆరోపించిన ఘోష్... కాల్పులు జరపడానికి, లాఠీఛార్జి చేయడానికి ఆదేశాలు ఇవ్వలేదని మండిపడ్డారు.

ప్రభుత్వ ఆస్తులను కాల్చివేయడానికి అవేమైనా వారి తండ్రుల నుంచి వచ్చిన ఆస్తులా అని మండిపడిన ఘోష్ పన్ను చెల్లింపుదారుల సొమ్ముతో కట్టిన ఆస్తులను ఎలా ధ్వంసం చేస్తారని ప్రశ్నించారు. జాతివ్యతిరేక శక్తులపై యూపీ, అసోం, కర్ణాటక ప్రభుత్వాలు కాల్పులు జరిపి మంచి పనిచేశాయని పేర్కొన్నారు. యూపీ తరహాలో ప్రభుత్వ ఆస్తులను ధ్వంసం చేసే వారికి కాల్చిపారేయాలని అభిప్రాయపడ్డారు.

ఇదీ చూడండి:'శబరిమలకు నేరుగా రైలు మార్గం లేనిది ఇందుకే...'