ప్రశాంతంగా ఝార్ఖండ్​ మూడో విడత పోలింగ్​

ఝార్ఖండ్​ అసెంబ్లీ ఎన్నికల మూడో విడత పోలింగ్​ ప్రారంభమైంది. 17 నియోజకవర్గాల్లోని 7,016 పోలింగ్​ కేంద్రాల్లో ఓటింగ్​ ప్రశాంతంగా జరుగుతోంది. ఉదయాన్నే ఓటు వేసేందుకు పోలింగ్​ కేంద్రాలకు చేరుకుంటున్నారు ప్రజలు. ఎలాంటి అవాంఛనీయ ఘటనలు చోటు చేసుకోకుండా పటిష్ట భద్రత ఏర్పాటు చేశారు అధికారులు. 309 మంది అభ్యర్థులు తమ భవితవ్యాన్ని తేల్చుకోనున్నారు.

ఝార్ఖండ్​ విధానసభ ఎన్నికల మూడో విడత పోలింగ్​ ప్రశాంతంగా జరుగుతోంది. నక్సల్​ ప్రభావిత ప్రాంతాలు ఉన్న కారణంగా ఎలాంటి అవాంఛనీయ ఘటనలకు తావులేకుండా పటిష్ట భద్రత ఏర్పాటు చేశారు అధికారులు. ఉదయాన్నే పోలింగ్​ కేంద్రాలకు చేరుకుని తమ ఓటు హక్కును వినియోగించుకుంటున్నారు ప్రజలు.

విధుల్లో 40 వేల మంది..

17 నియోజకవర్గాల్లో మొత్తం 7,016 పోలింగ్​ కేంద్రాలు ఏర్పాటు చేశారు ఎన్నికల అధికారులు. నక్సల్​ ప్రభావిత ప్రాంతాల్లోని 1,008 కేంద్రాలను సమస్యాత్మక, 543 పోలింగ్​ స్టేషన్లను సున్నిత ప్రాంతాలుగా గుర్తించారు. సుమారు 40 వేల మంది పోలింగ్​ సిబ్బంది విధుల్లో ఉన్నారు. రాంచీ, హతియా, కాన్కే, బర్కతా, రామ్​గర్ ప్రాంతాల్లో ఉదయం 7 గంటల నుంచి సాయంత్రం 5 గంటల వరకు పోలింగ్ జరగనుండగా.. ఇతర ప్రాంతాల్లో మధ్యాహ్నం 3 గంటలకు పోలింగ్ ముగుస్తుంది.

బరిలో ప్రముఖులు..

ఈ ఎన్నికల్లో 309 మంది అభ్యర్థులు బరిలో ఉన్నారు. మొత్తం 56,18,267 మంది ఓటర్లు అభ్యర్థుల భవితవ్యం తేల్చనున్నారు. ఈ విడత ఎన్నికలో ఝార్ఖండ్ మాజీ ముఖ్యమంత్రి, ఝార్ఖండ్ వికాస్ మోర్చా అధ్యక్షుడు బాబులాల్ మరండి (ధన్వార్ నియోజకవర్గం), విద్యాశాఖ మంత్రి నీరా యాదవ్ (కొడర్మ) బరిలో ఉన్నారు. 2014 ఎన్నికల్లో ఓటమిపాలైన ఏజేఎస్​యూ పార్టీ అధినేత, మాజీ ఉపముఖ్యమంత్రి సుదేశ్ మహ్తో సిల్లీ నియోజకవర్గం నుంచి పోటీ చేస్తున్నారు.

ఈ నెల 16, 20 తేదీల్లో నాలుగు, ఐదో విడత పోలింగ్​ జరగనుంది. డిసెంబర్​ 23న ఎన్నికల ఫలితాలు వెలువడనున్నాయి.

ఇదీ చూడండి: అసమానతలే మానవాభివృద్ధికి అతిపెద్ద విఘాతం