మహారాష్ట్ర, హరియాణా అసెంబ్లీ ఎన్నికల్లో అనూహ్య ఫలితాలు వెలువడ్డాయి. ఎగ్జిట్‌ పోల్స్‌ అంచనాలను తారుమారు చేస్తూ హరియాణాలో హంగ్‌ ఏర్పడగా.. మహారాష్ట్రలో భాజపా-శివసేన కూటమి విజయం సాధించింది. అయితే ఈ ఫలితాల్లో మహిళల ప్రాతినిధ్యం అంతంతమాత్రంగానే ఉంది. అసెంబ్లీకి ఎన్నికైన మహిళల సంఖ్య మొత్తం సీట్లలో కనీసం 10శాతం కూడా లేకపోవడం గమనార్హం.
మహారాష్ట్రలో 23 మంది..
మహారాష్ట్రలో మొత్తం 288 అసెంబ్లీ నియోజకవర్గాలున్నాయి. తాజా ఫలితాల్లో కేవలం 23 మంది మహిళలు శాసనసభకు ఎన్నికయ్యారు. భాజపా నుంచి అత్యధికంగా 17 మంది మహిళా అభ్యర్థులు పోటీ చేయగా.. వీరిలో 9 మంది విజయం సాధించారు. రాష్ట్ర మంత్రి పంకజా ముండే, భాజపా సీనియర్‌ నేత ఏక్‌నాథ్‌ ఖడ్సే కుమార్తె రోహిణీ ఓటమి చవిచూశారు.
2014లో జరిగిన ఎన్నికలతో పోలిస్తే ఈసారి అసెంబ్లీకి ఎన్నికైన మహిళల సంఖ్య కాస్త మెరుగుపడింది. 2014 ఎన్నికల్లో అన్ని పార్టీల నుంచి మొత్తం 277 మంది మహిళా అభ్యర్థులు పోటీ చేయగా.. వారిలో 20 మంది గెలిచారు.