'మనోళ్లు చర్చలు జరుపుతూ కాలయాపన చేస్తున్నారుగా.. మనం ఈ లోపు రోడ్డేసేద్దాం.. అప్పుడు భారత్ ఎంత అరిచి గీపెట్టినా వెనక్కి తగ్గొద్దు..' ఇది ఆగస్టు 31కి ముందు చైనా దళాల ప్లాన్.. ఆ రోజు రాత్రి మాల్డో-రజాంగ్‌లాకు రోడ్డు వేసేందుకు అవసరమైన సరంజామాతో శిబిరం నుంచి బయల్దేరిన చైనా దళాలకు గట్టి షాక్‌ తగిలింది. మిలమిలలాడే రాకెట్‌ లాంఛర్లతో భారత దళాలు కనిపించాయి. ముందు మేకపోతు గాంభీర్యం ప్రదర్శించినా భారత్ బెదరకపోవడం వల్ల హెచ్చరికగా కొన్ని రౌండ్లు గాల్లోకి కాల్పులు జరిపింది. గల్వాన్‌ వద్ద భారత్ చేసిన ప్రతిదాడి గుర్తొచ్చిందో ఏమో చైనా దళాలు కాళ్లీడ్చుకొంటూ తిరిగి తమ స్థావరానికి చేరుకున్నాయి. ఈ ఆపరేషన్ మొత్తాన్ని కేవలం 120 నిమిషాల్లో ముగించింది.
ఆలోచనా తీరు మారడం వల్లే...
గల్వాన్‌ ఘటనకు ముందు భారత్ దళాలు కొంత ఆత్మరక్షణ శైలిని అనుసరించేవి. 1962 యుద్ధం తర్వాత భారత్ అనుసరించే ఈ శైలిని చైనా వాడుకుంది. తరచూ మన భూభాగాలను చిన్నచిన్న ముక్కలుగా ఆక్రమించడం మొదలుపెట్టింది. గల్వాన్‌ ఘటన తర్వాత జులై 3న ప్రధాని మోదీ లద్దాక్‌లో పర్యటించారు. ఈ సందర్భంగా నార్తన్‌ కమాండర్‌ వైకే జోషీ, 14 క్రాప్స్‌ జీఓసీ లెఫ్టినెంట్‌ జనరల్‌ హరీందర్‌ సింగ్‌తో భేటీ అయ్యారు. ఈ సందర్భంగా ఓ దశలో ప్రధాని ‘చైనా ఏం చేసింది.. ఏం చేయబోతోందో నాకు అనవసరం.. మీరు ఏం చేశారు.. ఏం చేయబోతున్నారనే దానిపైనే నాకు ఆసక్తి’ అని తేల్చిచెప్పారు. అనంతరం మోదీ 17 క్రాప్స్‌ను ఉద్దేశించి ప్రసంగించారు. భారత ఆర్మీలో మౌంటేన్ స్ట్రైక్‌ గ్రూప్‌ ఇదొక్కటే. చైనాతో డీల్‌ చేయడానికి దీనిని అక్కడకు తరలించారు.
మోదీ పర్యటన ఓ రకంగా భద్రతా దళాలకు స్వేచ్ఛనిచ్చింది. అప్పటి నుంచి వ్యూహం మారిపోయింది. చైనా ఆధీనంలోని భూభాగాన్ని విడిపించాలంటే.. చైనాకు కీలకమైన చోట మనం పట్టుబిగించాలని నిర్ణయించారు. చైనాకు కీలకమై ఎత్తయిన పర్వత శిఖరాలను భారత్ ఆధీనంలోకి తీసుకురావాలనుకున్నారు. దీనికి ఆర్మీచీఫ్‌ ముకుంద్‌ నరవాణేకు గతంలో చైనాను డీల్‌ చేసిన అనుభవం ఉంది. అది భారత్ వ్యూహాలకు బాగా ఉపయోగపడింది. మన దళాలు నిశ్శబ్ధంగా ఓ ప్రణాళికను సిద్ధం చేశాయి. ఇది కేవలం అత్యున్నత స్థాయిలో వారికి మాత్రమే తెలుసు. ఆ ఆపరేషన్‌లో పాల్గొనే దళాలకు కూడా ఏం చేయబోతున్నారో తెలియదు. మెల్లగా ఎల్‌ఏసీ వెంట భారత్ అదనపు బలగాలను తరలించడం మొదలుపెట్టింది. మరోపక్క భారత నావికాదళం మలక్కా జలసంధికి వెళ్లే మార్గాల్లో గస్తీని ముమ్మరం చేసింది. అప్పటికే ఉన్న మౌంటేన్ స్ట్రైక్‌ డివిజన్‌కు అదనంగా మరింత పర్వయోధులను రంగంలోకి దించింది. వీరందరినీ ఆపరేషన్‌కు సిద్ధం చేసే బాధ్యతను జీఓసీ 17 క్రాప్స్‌ లెఫ్టినెంట్‌ జనరల్‌ సవ్‌నీత్‌ సింగ్‌కు అప్పజెప్పారు. వీరే కాదు.. వివిధ విభాగాలకు చెందిన దళాలు భారీగా లద్దాక్‌ చేరడం మొదలైంది.
విఫలమైన కాలయాపన
చర్చలతో కాలయాపన చేయాలని చైనా వ్యూహం పన్నింది. పాంగాంగ్‌ వద్ద ఫింగర్‌ 4, 5ను చైనా వీడే విషయమై చాలా రౌండ్లపాటు చర్చలు జరిగినా అవి విఫలం అవుతూ వచ్చాయి. అనుకున్నట్లే జరుగుతుండటం వల్ల చైనా మితిమీరిన ఆత్మవిశ్వాసంలోకి వచ్చింది. కొవిడ్‌, ఆర్థిక సమస్యలతో తల్లడిల్లుతున్న భారత్‌కు ఈ దళాల మోహరింపు తలకు మించిన భారంగా మారి.. ఇక చేతులు ఎత్తేస్తుందని భావించింది. ఒక్క తూటా కాల్చకుండానే విజయం సాధించొచ్చని అంచనా వేసుకొంది. కానీ, దీనికి భిన్నంగా.. భారత్ కూడా చైనానే బేరానికి వచ్చేట్లు చేయాలని నిర్ణయించింది. అందుకే ఈ సారి సరస్సుకు దక్షిణ ఒడ్డున ఎత్తైన శిఖరాలను లక్ష్యంగా చేసుకొంది.