మహిళలపై ఘోరాలూ నేరాలూ అడ్డూ ఆపూ లేకుండా కొనసాగుతున్నాయి. ఉత్తర్‌ ప్రదేశ్‌లోని ఫతేపూర్‌ జిల్లాలో రెండు రోజల క్రితం (డిసెంబరు 14) పద్దెనిమిదేళ్ల అమ్మాయిపై ఓ మానవ మృగం అత్యాచారానికి పాల్పడటమే కాగా కిరోసిన్‌ గుమ్మరించి నిప్పంటించిన ఘటన సభ్య సమాజాన్ని నివ్వెరపరచింది. కాన్పూర్‌లోని ఓ వైద్యశాలలో 90శాతం కాలిన గాయాలతో బాధిత మహిళ కొన ప్రాణాలతో కొట్టుమిట్టాడుతున్న విషాదం గుండెల్ని మెలిపెడుతోంది. ఫతేపూర్‌ దారుణం చోటుచేసుకున్న రోజే దేశవ్యాప్తంగా మహిళలపై రమారమి వంద అత్యాచార ఘటనలు జరగడం గమనార్హం. యావద్దేశాన్ని కలచివేసిన ‘నిర్భయ’ హత్యాచార ఘటన జరిగి ఏడేళ్లవుతున్న తరుణంలో భారతావనిలో మహిళల కన్నీటి ఘోష మరింత విస్తరిస్తోందన్న సత్యాన్నే వెల్లడిస్తున్న పరిణామాలివి.
‘నిర్భయ’ కేసులో నలుగురు నిందితులకు ఇప్పటికీ శిక్ష పడలేదు. వారికి ఉరిశిక్ష పడుతుందా లేదా అన్నది ఇంకా తేలాల్సి ఉంది. నిందితుల్లో ఒకరు దాఖలు చేసిన రివ్యూ పిటిషన్‌పై విచారణ అనంతరం డిసెంబరు 18న ఈ కేసు న్యాయస్థానం ముందుకు రానుంది. భాజపా మాజీ శాసనసభ్యుడు కుల్దీప్‌ సింగ్‌ సెంగర్‌తోపాటు అతగాడి సన్నిహితులకూ ప్రమేయం ఉన్న ఉన్నావ్‌ అత్యాచారం కేసుపైనా ఇవాళే తుది తీర్పు వెలువడే అవకాశం ఉందంటున్నారు. కేసులు, విచారణలు, శిక్షలతో నిమిత్తం లేకుండా దేశవ్యాప్తంగా అత్యాచారాలు అంతకంతకూ విస్తరిస్తున్నాయి. కిందటి నెల దేశవ్యాప్తంగా భీతావహ హత్యాచార ఘటనలు అనేకం చోటు చేసుకున్నాయి. విస్తరిస్తున్న ఈ అత్యాచార సంస్కృతికి ప్రభుత్వాలుగానీ, సామాజిక కట్టుబాట్లు గానీ అడ్డుకట్టవేయలేకపోతుండటం బాధాకరం.
గణాంకాలు
జాతీయ నేర గణాంక సంస్థ (ఎన్‌సీఆర్‌బీ) వివరాల ప్రకారం 2017లో దేశంలో 33,885 అత్యాచార కేసులు నమోదయ్యాయి. దాని ప్రకారం సగటున ప్రతి రోజూ 93 మంది మహిళలు బాధితులవుతుండగా, వారిలో మూడోవంతు మైనర్లు కావడం భయపెడుతున్న పరిణామం. 2017లోనే 88వేల మంది మహిళలపై లైంగిక వేధింపుల కేసులు నమోదు కావడం గమనార్హం. ఈ లెక్కన సగటున రోజూ 240 మంది మహిళలు లైంగిక వేధింపుల పాలబడుతున్నారన్నమాట! కిందటి నెల హైదరాబాద్‌ సమీపంలో ‘దిశ’ హత్యాచార ఘటన, అనంతరం ఉన్నావ్‌లో సాక్ష్యం చెప్పేందుకు న్యాయస్థానానికి వెళుతున్న అత్యాచార బాధిత మహిళపై కిరోసిన్‌ పోసి కాల్చి చంపిన దురన్యాయం, పట్నా కళాశాలలో 20ఏళ్ల విద్యార్థినిపై జరిగిన సామూహిక అత్యాచారం... ఇలా చెప్పుకొంటూపోతే ఈ దుశ్శాసన పర్వానికి అంతూ పొంతూ ఉండదు!
ఎండమావిగ మారిన న్యాయం
‘దిశ’ హత్యాచార కేసులో నిందితుల ‘ఎన్‌కౌంటర్‌’ దేశవ్యాప్తంగా పెద్ద చర్చకు తెరలేపింది. ఏళ్లూ పూళ్లూ నాన్చకుండా ఘోరానికి తెగబడినవారిపట్ల సరైన విధంగా స్పందించి పోలీసులు ‘తక్షణ న్యాయం’ అందించారని మెజారిటీ ప్రజలతో పాటు అధికారస్వామ్యంలో కీలక పాత్ర పోషిస్తున్న అత్యధికులూ అభిప్రాయపడ్డారు. నిజానిజాలను నిగ్గుతేల్చే విచారణ, న్యాయస్థానం తీర్పులతో నిమిత్తం లేకుండా పోలీసులే ఎక్కడికక్కడ ఈ తరహా ‘మూక న్యాయానికి’ ఆరంభం పలకడం వ్యవస్థల పతనానికి తార్కాణమన్న వాదన కూడా మరోవైపు గట్టిగా వినిపిస్తోంది. సత్వర న్యాయం ఎండమావిగా మారడమే ఈ దురవస్థకు కారణం.