చిన్ని ఏనుగు చింత వీడె- మిత్రులతో గెంతులేసె!

వరదల కారణంగా కుటుంబానికి దూరమైన రెండు నెలల పసికందు ఇప్పుడు ఓ పునరావాస కేంద్రంలో సందడి చేస్తోంది. అదేంటబ్బా అనుకుంటున్నారా? అవును మరి తప్పిపోయింది ఓ ఏనుగుపిల్ల. తల్లిదండ్రులకు దూరమై అడవిలో ఇతర ఏనుగు బృందాలు చేరదీయక కష్టాల్లో ఉన్న ఆ బుజ్జి  ఏనుగుకు అటవీశాఖ అధికారులు ఆశ్రయం కల్పించారు.

రెండు నెలల వయసున్న మరో పిల్ల ఏనుగును అక్కున చేర్చుకుంది కేరళ కాప్పుకాడు ఏనుగుల పునరావాస కేంద్రం.

అడవి నుంచి ఆనందాల గూటికి

నీలంబర్​లో ఇటీవల భారీ వరదల కారణంగా కుటుంబాన్ని కోల్పోయింది ఓ బుజ్జి ఏనుగు పిల్ల. కరింపుజ ప్రాంతంలో జులై 14వ తేదీన అటవీ శాఖ అధికారులు దానిని గుర్తించారు. వాహనంలో తీసుకెళ్లి అడవిలో విడిచిపెట్టారు. కానీ, అక్కడ తిరుగుతున్న రెండు ఏనుగు గుంపులు ఈ చిన్నారి ఏనుగును ఆదరించలేదు. తమతో చేర్చుకోలేదు.

బిక్కమొహం వేసుకుని ఒంటరిగా తిరుగుతున్న ఏనుగు పిల్లను డిప్యూటీ రేంజర్ రంజిత్ కుమార్, డిప్యూటీ వార్డెన్ అనిల్​కుమార్​లు చేరదీశారు. కప్పుకడు సంరక్షణ కేంద్రానికి తీసుకువచ్చారు. ఇక్కడ రెండు నెలలు వయసున్న ఈ పిల్ల ఏనుగుకు కొత్త స్నేహితులు కలిశారు. ఇంకేముంది ఆనందంతో ఆటలాడేస్తూ గెంతులేస్తోంది.

@ఏనుగుల నిలయం.కామ్

ఇప్పటికే ఈ సంరక్షణ కేంద్రంలో మూడేళ్ల మను, రెండున్నరేళ్ల మాయ, నాలుగేళ్ల పూర్ణ, ఏడాది వయసున్న కన్నన్ అర్జునన్ వంటి ఐదు పిల్ల ఏనుగులున్నాయి. ఈ కేంద్రంలో ప్రస్తుతం 19 ఏనుగులు పునరావాసం పొందుతున్నాయి.

పశువైద్యుల సూచనల మేరకు సంరక్షకుడు రవీంద్రన్ ఈ ఏనుగుల దినచర్యను రూపొందిస్తారు.

ఇదీ చూడండి:ఈ గుడిలో పూజలు గాంధీకే.. దేవుడికి కాదు