కశ్మీర్​లో ఉగ్రదాడికి భారీ కుట్ర- కేంద్ర హోంశాఖ అప్రమత్తం

గణతంత్ర వేడుకలకు ముందు జమ్ముకశ్మీర్​లో భారీ దాడి చేసేందుకు ఉగ్రవాదులు కుట్ర పన్నినట్లు తెలిసింది. దాడి ప్రణాళికకు సంబంధించి కీలక సమాచారం తెలుసుకున్న నిఘా వర్గాలు... భద్రతా సంస్థల్ని అప్రమత్తం చేశాయి.

గణతంత్ర వేడుకలకు ముందు అలజడి సృష్టించేందుకు ఉగ్రవాదులు భారీ కుట్ర పన్నినట్లు వెల్లడైంది. జమ్ముకశ్మీర్​లోని సైనిక స్థావరాలపై దాడి చేయడమే లక్ష్యంగా జైష్​-ఎ-మహ్మద్​, హిజ్బుల్​ ముజాహిద్దీన్​ సంస్థలు కలిసి ప్రణాళిక రచించినట్లు నిఘా వర్గాల ద్వారా తెలిసింది.

యాపిల్ తోటల్లో రహస్య భేటీ..

జైష్​-ఎ-మహ్మద్​, హిజ్బుల్ ముజాహిద్దీన్​ సంస్థల ప్రతినిధుల మధ్య కీలక సమావేశం జరిగినట్లు నిఘా వర్గాలు కనుగొన్నాయి. పుల్వామాలోని యాపిల్​ తోటల్లో 8 మంది ముష్కరులు సమావేశమై... దాడి ప్రణాళికపై చర్చించినట్లు తెలుసుకున్నాయి. ఈ 8 మంది ఉగ్రవాదుల్లో ఇద్దరు ఆత్మాహుతి దళ సభ్యులని గుర్తించాయి. షోపియాన్​లోని సైనిక స్థావరంపై దాడి చేయాలన్నదే వీరి ఆలోచనగా భావిస్తున్నాయి

హోంశాఖ అప్రమత్తం..

నిఘా వర్గాల సమాచారం నేపథ్యంలో కశ్మీర్​లోని సైన్యం, ఇతర భద్రతా దళాలను అప్రమత్తం చేసింది కేంద్ర హోంశాఖ.

ఇదీ చూడండి: విమానాశ్రయంలో బాంబు ఘటన నిందితుడి లొంగుబాటు