2.1 కిలోమీటర్లు... ఇది పెద్ద దూరమే కాదు అనిపించకపోవచ్చు. కానీ ఇప్పుడిది భారతీయులకు గుర్తుండిపోయే సంఖ్య. ఈ దూరంలోనే ల్యాండర్ విక్రమ్తో భారత అంతరిక్ష కేంద్రం(ఇస్రో)కు సంబంధాలు తెగిపోయాయి.
చంద్రయాన్-2 ప్రయోగం అంతా సజావుగా సాగుతుందని అనుకున్న సమయంలో ఊహించని పరిణామం ఎదురైంది. చివరి నిమిషంలో సమస్య ఎదురవడం వల్ల అప్పటికే ఉన్న ఉత్కంఠ మరింత పెరిగింది. శాస్త్రవేత్తల్లో ఏదో తెలియన ఒత్తిడి కనిపించింది. నిర్దేశిత ల్యాండింగ్ సమయం గడిచిపోయినప్పటికీ.. ల్యాండర్ నుంచి ఎలాంటి సంకేతాలు రాకపోవడం వల్ల అసలేం జరుగుతోందో అర్థంకాని పరిస్థితి నెలకొంది.
ఆ సమయంలో... చంద్రయాన్-2లోని అతి కీలక ఘట్టాన్ని ప్రపంచ వైజ్ఞానిక లోకం మొత్తం వీక్షిస్తోంది. దేశ నలుమూలల నుంచి ఎంపిక చేసిన 60 మంది విద్యార్థులతో కలిసి ప్రధాని నరేంద్ర మోదీ బెంగళూరు ఇస్రో కేంద్రంలో ఉన్నారు. సమస్యను గుర్తించిన వెంటనే ఇస్రో ఛైర్మన్ కె. శివన్... ల్యాండర్ పరిస్థితిని ప్రధానికి వివరించారు. కాసేపటికి అధికారిక ప్రకటన చేశారు. చంద్రుడి ఉపరితలానికి 2.1 కిలోమీటర్ల దూరంలో విక్రమ్తో ఇస్రో కేంద్రానికి సంబంధాలు తెగిపోయినట్లు వెల్లడించారు. డేటా మొత్తాన్ని విశ్లేషించి, ఏం జరిగిందో తెలుసుకుంటామని చెప్పారు శివన్.
ల్యాండింగ్లో సమస్యతో శాస్త్రవేత్తలు తీవ్ర నిరాశకు గురయ్యారు. వారందరికీ ధైర్యం చెప్పారు ప్రధాని. జీవితంలో ఉత్థానపతనాలు సహజమని, విశ్వాసం కోల్పోకుండా ముందుకు సాగాలని పిలుపునిచ్చారు.
