'ఎక్కువ మాట్లాడండి... కరోనాను జయించండి!'

కరోనా భయాన్ని జయించేందుకు ఎక్కువ మాట్లాడాలి అంటున్నారు ప్రపంచ ప్రఖ్యాత ధ్యానగురు దీపక్ చోప్రా. లాక్​డౌన్​ సమయంలో ధ్యానం చేసి వైరస్​ ఒత్తిడి నుంచి బయటపడొచ్చు అంటున్నారు.

వేగంగా వ్యాపిస్తున్న కరోనా మహమ్మారిని చూసి కొందరు బెంబేలెత్తిపోతున్నారు. మరికొందరు లాక్​డౌన్ కారణంగా ఇళ్లకే పరిమితమై ఒంటరితనం, ఒత్తిడికి లోనవుతున్నారు. ఈ అనవసర ఆందోళనలకు చెక్​ పెట్టి, మనస్సును నిశ్చలంగా ఉంచుకునేందుకు ఓ ఉపాయం చెబుతున్నారు.. ప్రపంచ ప్రఖ్యాత ధ్యానగురువు, రచయిత దీపక్ చోప్రా. మనసుకు నచ్చినవారితో ఎక్కవ సేపు మాట్లాడడం వల్ల కరోనా ఒత్తిడిని జయించవచ్చు అంటున్నారు.

"ఈ గజిబిజి జీవితాల్లో ఓ ఫోన్​కాల్​ రెండు మూడు నిమిషాలు మాట్లాడే సమయం కూడా దొరకట్లేదు. కానీ, సామాజిక దూరం వల్ల ఇప్పుడు ఆ సమయం ఉంది. మీకు నచ్చిన కుటుంబ సభ్యుడితోనో, స్నేహితుడితోనో గంటల తరబడి మాట్లాడి ఫలితాన్ని పొందండి. అయితే వారితో వైరస్​ గురించి ఎక్కువగా మాట్లాడొద్దు. ప్రతి ఒక్కరిలో ఏదో ఓ స్థాయిలో శాంతి, నిశ్చలత్వము ఉంటుంది. దానిని వీలైనంత ఎక్కువమంది అనుభవించాలి. వైరస్​ను జయించే సానుకూల పరిష్కారం కనుగొనకపోతే, ఇక దాని గురించి చింతించి ప్రయోజనం ఏమిటి? ఇలాంటి సమయంలోనే మనం మరింత దృఢమైన వ్యక్తుల్లా మారాలి."

-దీపక్​ చోప్రా, ప్రపంచ ప్రఖ్యాత ధ్యాన గురు

కరోనా భయాన్ని పోగొట్టేందుకు ధ్యానం ఎంతో సహకరిస్తుందని​ పేర్కొన్నారు దీపక్. న్యూయార్క్​ వెల్​నెస్​ క్లబ్​ ​ఆధ్వర్యంలో ఆదివారం ఆయన ఆన్​లైన్​ ధ్యాన కార్యక్రమం చేపట్టారు. ఇంట్లో నుంచే లైవ్​ వీడియో ద్వారా ధ్యానం ఎలా చేయాలో వివరించారు.

ఇదీ చదవండి:అమెరికా కంటే భారత్‌లోనే కరోనా మరణాల రేటు ఎక్కువ