నిర్భయ నిందితుడి రివ్యూ పిటిషన్​పై నేడు సుప్రీం విచారణ

తనకు విధించిన మరణశిక్షను పునఃసమీక్షించాలని సుప్రీంకోర్టును ఆశ్రయించాడు నిర్భయ నిందితుల్లో ఒకడైన అక్షయ్​ కుమార్​ సింగ్​. ఈ రివ్యూ పిటిషన్​పై నేడు విచారణ చేపట్టనుంది అత్యున్నత న్యాయస్థానం. ఇప్పటికే మిగతా ముగ్గురి అభ్యర్థనను తిరస్కరించిన సుప్రీం.. సింగ్​ వ్యాజ్యంపై వాదనలు విననుంది.

నిర్భయ ఘటన నిందితుల్లో ఒకడైన అక్షయ్​ కుమార్​ సింగ్​ దాఖలు చేసిన రివ్యూ పిటిషన్​పై సుప్రీంకోర్టు ఇవాళ విచారణ చేపట్టనుంది. 2017లో తనకు మరణశిక్ష విధించిన తీర్పును పునఃసమీక్షించాలన్న సింగ్​ వ్యాజ్యాన్ని.. ప్రధాన న్యాయమూర్తి జస్టిస్​ బోబ్డే, జస్టిస్​ భానుమతి, జస్టిస్​ అశోక్​ భూషణ్​తో కూడిన త్రిసభ్య ధర్మాసనం విచారించనుంది. సింగ్​ రివ్యూ పిటిషన్​కు వ్యతిరేకంగా కోర్టును ఆశ్రయించిన నిర్భయ తల్లి వాదనలు కూడా విననుంది సుప్రీం.

నిర్భయ ఘటనలో నిందితులైన ముకేశ్​, పవన్​ గుప్తా, వినయ్​ శర్మల రివ్యూ పిటిషన్లను గతేడాది జులై 9నే కోర్టు కొట్టివేసింది. తాజాగా మరో నిందితుడైన అక్షయ్​ కుమార్ సింగ్​.. మరణశిక్షపై పునఃసమీక్షించాలంటూ సుప్రీంను ఆశ్రయించాడు.

మొత్తం ఆరుగురు..

2012 డిసెంబరు 16న అర్ధరాత్రి దక్షిణ దిల్లీలో 23 ఏళ్ల ఓ విద్యార్థినిపై ఈ నలుగురితో పాటు మరో ఇద్దరు మొత్తం ఆరుగురు కిరాతకానికి తెగించారు. కదిలే బస్సులోనే ఆ యువతిని అత్యాచారం చేసి అనంతరం బస్సు నుంచి కిందకు తోసేశారు. ఈ ఘటనలో తీవ్రంగా గాయపడ్డ ఆ విద్యార్థిని.. అదే ఏడాది డిసెంబరు 29న సింగపూర్​లోని మౌంట్​ ఎలిజబెత్​ ఆసుపత్రిలో చికిత్స పొందుతూ తుదిశ్వాస విడిచింది.

ముగ్గురి వ్యాజ్యాలు తిరస్కరణ

ఈ ఆరుగురు నిందితుల్లో ఒకడైన రామ్​సింగ్​ తిహాడ్​ కారాగారంలో ఆత్మాహుతి చేసుకున్నాడు. ఇంకొకడు మైనర్​ అయినందున మూడేళ్ల మాత్రమే శిక్ష విధించారు. మిగతా నలుగురికి మరణశిక్ష విధిస్తూ దిల్లీ హైకోర్టు, ట్రయల్ కోర్టు తీర్పునిచ్చాయి. దీనిపై 2017లో విచారణ జరిపిన సుప్రీంకోర్టు.. దిల్లీ హైకోర్టు తీర్పును సమర్థిస్తూ ముగ్గురు నిందితుల పిటిషన్లను తోసిపుచ్చింది. ఇప్పుడు అక్షయ్​ కుమార్ సింగ్ పిటిషన్​ను విచారించనుంది.