దక్షిణ భారతానికి తొలి 'సుఖోయ్ 30 ఎంకేఐ' దళం

భారత గగనతలాన్ని మరింత బలోపేతం చేసే దిశగా తమిళనాడు తంజావూరులోని వైమానిక స్థావరంలో సుఖోయ్ 30 ఎంకేఐ యుద్ధ విమానాలను ప్రవేశపెట్టారు త్రిదళాధిపతి బిపిన్ రావత్, వైమానిక దళ చీఫ్ ఆర్​కేఎస్ బదౌరియా. ఎలాంటి పరిస్థితినైనా ఎదుర్కొనేందుకు రక్షణదళాలు సిద్ధంగా ఉన్నాయని పేర్కొన్నారు రావత్.

ఎప్పుడు ఉద్రిక్తతలు తలెత్తే అంశాన్ని అంచనా వేయలేమని, కానీ రక్షణదళాలు ఎలాంటి పరిస్థితినైనా ఎదుర్కొనేందుకు సిద్ధంగా ఉంటాయన్నారు త్రిదళాధిపతి బిపిన్ రావత్. తమిళనాడు తంజావూరులోని 'టైగర్​షార్క్స్​' వైమానిక స్థావరం వేదికగా వాయు దళాధిపతి ఆర్​కేఎస్​ బదౌరియాతో కలిసి సుఖోయ్​-30 ఎంకేఐ యుద్ధ విమానాలను వాయుసేనలో ప్రవేశపెట్టారు. ఈ కార్యక్రమానికి డీఆర్​డీఓ ఛైర్మన్ జి. సతీశ్​రెడ్డి హాజరయ్యారు.

తంజావూరు వైమానిక స్థావరంలో మోహరించిన సుఖోయ్ 30 ఎంకేఐ శ్రేణి యుద్ధ విమానాలు సముద్రతలాన్ని పర్యవేక్షించనున్నాయి.

కార్యక్రమంలో భాగంగా సుఖోయ్ యుద్ధవిమానానికి నీటితో గౌరవ వందనం సమర్పించారు అధికారులు. ప్రస్తుతం ప్రవేశపెట్టిన సుఖోయ్​ యుద్ధ విమానాల్లో 3 వందల కిలోమీటర్ల లక్ష్యాన్ని ఛేదించగల బ్రహ్మోస్ సూపర్​సోనిక్ క్షిపణిని వినియోగించనున్నట్లు వాయుదళ అధికారులు వెల్లడించారు.

ఇదీ చూడండి: మంచు కురిసింది.. జవాను పెళ్లి వాయిదా పడింది!