పదేళ్ల తర్వాత అమెరికా నుంచి వచ్చి టీచర్​పై కేసు!

పదేళ్ల క్రితం ముంబయిలో తనను లైంగికంగా వేధించాడని అమెరికా నుంచి వచ్చిన యువతి.. ఓ ఉపాధ్యాయుడిపై కేసు పెట్టింది. ఫిర్యాదు స్వీకరించిన పోలీసులు నిందితుడిని అరెస్టు చేసి, వివిధ కోణాల్లో విచారిస్తున్నారు.

ముంబయిలో 55 ఏళ్ల గిటార్​ టీచర్​ను లైంగిక వేధింపుల కేసులో పోలీసులు అరెస్ట్ చేశారు. దాదాపు 10 ఏళ్ల క్రితం తనను లైంగిక వేధించాడని అమెరికా నుంచి వచ్చి మరీ కేసు పెట్టింది ఓ యువతి.

ఏం జరిగింది..?

పదేళ్ల క్రితం సంగీతం బోధించడానికి అంధేరిలోని విద్యార్థిని ఇంటికి వెళ్లిన గిటారు​ ఉపాధ్యాయుడు లైంగికంగా వేధించేవాడని బాధితురాలు ఆరోపించింది. అప్పటికి ఆమె వయస్సు సుమారు తొమ్మిదేళ్లు. తర్వాత చిన్నారి ఉన్నత చదువుల కోసం అమెరికా వెళ్లింది. సుమారు మూడేళ్ల (2007-2010) పాటు తనను లైంగికంగా వేధించాడని ఆమె ఫిర్యాదులో పేర్కొన్నట్లు అధికారులు వెల్లడించారు. ప్రస్తుతం ఆమె అమెరికాలో ఓ కళాశాలలో చదువుతున్నట్లు అధికారులు తెలిపారు.

దశాబ్దం తర్వాత ఇటీవల స్వదేశానికి వచ్చిన ఆమె.. అప్పట్లో జరిగిన సంఘటన మరవలేక సంగీత బోధకుడిపై పోలీసులకు ఫిర్యాదు చేసింది. గిటారు నేర్పించే సమయంలో తనతో అసభ్యంగా ప్రవర్తించేవాడని బాధితురాలు ఆరోపించింది.

ఈ ఫిర్యాదు మేరకు నిందితుడిని అదుపులోకి తీసుకుని, వివిధ కోణాల్లో దర్యాప్తు చేస్తున్నట్లు ఓషివరా పోలీసులు తెలిపారు.

ఇదీ చూడండి:డ్రైవర్​కు కారు గిఫ్ట్​గా ఇచ్చిన యజమాని