'వీరుల త్యాగాలను పాఠ్యపుస్తకాల్లో హైలైట్​ చేయాలి'

దేశ చరిత్ర గురించి రాబోయే తరాలవారికి చాటి చెప్పాలని ఉపరాష్ట్రపతి వెంకయ్యనాయుడు పిలుపునిచ్చారు. స్వాతంత్ర్య సమర యోధుల వీరగాథలను పాఠ్యపుస్తకాలలో ప్రధాన అంశంగా చేర్చాలని సూచించారు.

చారిత్రక సంఘటనలపై సమగ్ర, ప్రామాణిక, నిష్పాక్షిక సమాచారాన్ని రాబోయే తరాలకు అందించాల్సిన అవసరం ఉందని అభిప్రాయపడ్డారు ఉపరాష్ట్రపతి వెంకయ్యనాయుడు. ఇందుకోసం దేశవ్యాప్తంగా అన్ని పాఠ్యపుస్తకాలలో స్వాతంత్ర్య సమరయోధుల శౌర్యం, త్యాగాల కథలను ప్రధానాంశంగా చేర్చాలని సూచించారు.

'నేతాజీ- ఇండియాస్​ ఇండిపెండెన్స్​ అండ్​ బ్రిటీష్​ ఆర్కైవ్స్​' పుస్తకం విడుదల సందర్భంగా ఈ వ్యాఖ్యలు చేశారు వెంకయ్య. ఈ పుస్తకాన్ని నేతాజీ సుభాష్​ చంద్రబోస్​- ఇండియన్​ నేషనల్​ ఆర్మీ(ఐఎన్​ఏ) ట్రస్ట్​ అసోసియేట్​ సభ్యుడు కల్యాణ్​ కుమార్​ దే రచించారు.

నేతాజీ నాయకత్వమే స్ఫూర్తిగా..

బుధవారం అంతర్జాతీయ యువజన దినోత్సవాన్ని పురస్కరించుకొని.. నేతాజీ నుంచి ప్రేరణపొంది నవ భారత నిర్మాణానికి కృషిచేయాలని యువతకు పిలుపునిచ్చారు వెంకయ్య. స్వతంత్ర సంగ్రామంలో భాగంగా.. నేతాజీ చైతన్యవంతమైన, సాహసోపేతమైన నాయకత్వం ప్రజలకు ఎంతగానో స్ఫూర్తినిస్తుందని కొనియాడారు. ఇది యువతరానికి మార్గదర్శకంగా నిలుస్తుందని చెప్పారు వెంకయ్య.

ఇదీ చదవండి:ఆమె స్తంభం ఎక్కడం చూస్తే ఎవరైనా ఫిదా!