వెండి వర్ణంలోని కశ్మీరం కోసం.. మళ్లీ వస్తున్నారు!

ఆహ్లాదకరమైన కశ్మీర్​ ప్రకృతి అందాలను తిలకించేందుకు సుదీర్ఘ కాలం తర్వాత పర్యటకులు ఆ ప్రాంతంలో అడుగుపెట్టారు. కొత్త ఏడాది సందర్భంగా వివిధ రాష్ట్రాలకు చెందిన ప్రజలు ఈ భూతల స్వర్గాన్ని తమ జ్ఞాపకాల్లో బంధించేందుకు తరలి వెళ్తున్నారు. ఆ పర్యటకులు, వ్యాపారులు.. తమ అనుభవాలను ఈటీవీ భారత్​తో పంచుకున్నారు.

ప్రకృతి అందాలతో భారత్​కు మకుటంలా నిలిచి మిరిమిట్లు గొలిపే కశ్మీర్​.. పర్యటకుల రాకతో మురిసింది. నూతన సంవత్సరం సందర్భంగా ఓ చక్కని అనుభూతిని తమ మనస్సుల్లో నింపుకునేందుకు సందర్శకులు కశ్మీర్​లో అడుగుపెట్టారు. దాదాపు ఏడాదిన్నర తర్వాత కశ్మీర్​ను పలకరించేందుకు రావడం వల్ల శ్వేతవర్ణంతో నిండిన ఆ ప్రాంతానికి పునర్వైభవం వచ్చినట్టు అయింది.

అప్పటి నుంచి..

2019లో ఆర్టికల్ 370 రద్దు, గతేడాది విధించిన ​లాక్​డౌన్​.. పర్యటక రంగంపై తీవ్ర ప్రభావం చూపింది. ఇప్పుడు కరోనా తగ్గుముఖం కారణంగా కార్యకలాపాలు పుంజుకున్నాయి. మళ్లీ కశ్మీర్​ అందాలపై సందర్శకులు చూపిస్తున్న ఆసక్తితో.. ఆ రంగంపై ఆధారపడిన వారిలో కొత్త ఆశలు చిగురించేలా చేసింది. పర్యటకుల రాక పట్ల వ్యాపారులు హర్షం వ్యక్తం చేస్తున్నారు.

సరికొత్తగా స్వాగతం..

మహారాష్ట్రకు చెందిన తొలి బృందాన్ని దాల్​ సరస్సు హౌస్​బోట్​ నిర్వాహకులు.. నూతన సంవత్సర శుభాకాంక్షలు తెలుపుతూ స్వాగతించారు. ఈ క్షణం తమకు పండుగతో సమానమని ఓ వ్యాపారి అన్నాడు.

పర్యటకులకు స్వాగతం పలుకుతూ..

"ఆర్టికల్​ 370 రద్దు తర్వాత మా హౌస్​ బోట్​కు తొలిసారి పర్యటకులు వస్తున్నారు. ఇది మాకు అతిపెద్ద పండుగ. మా వ్యాపారాలు మళ్లీ పుంజుకుంటున్నాయి."

-యాకూబ్​ ధానూ, హౌస్​బోట్​ యజమాని.

పర్యటకుల ఆనందం

మంచుదుప్పటిని కప్పుకున్న కశ్మీర్​ను చూసిన పర్యటకులు తమ అనుభూతిని పంచుకున్నారు. ఇక్కడి ఆహ్లాదకర వాతావరణం చూశాక తాము దూర ప్రయాణం చేశామన్న సంగతే మరిచిపోయామని అన్నారు. ఈ ప్రాంతం మహిళలకు సురక్షితమైనదని చెప్పడం విశేషం.

"ఇక్కడ చాలా అందంగా ఉంది. కొవిడ్​ తగ్గుముఖం పడుతున్నందు వల్ల ఇక్కడ పర్యటించాలనుకున్నాం. ఇక్కడి ప్రజలు చాలా మర్యాదస్తులు."

-కల్పన, పర్యటకురాలు

ఇదీ చూడండి :రైతులకు, కేంద్రానికి కుదరని సయోధ్య- 8న మళ్లీ చర్చలు