ఐఎన్​ఎక్స్ కేసులో చిదంబరం అరెస్టు తప్పదా?

కేంద్ర మాజీ మంత్రి, కాంగ్రెస్ నేత చిదంబరానికి సుప్రీంకోర్టు తీవ్ర నిరాశ ఎదురైంది. చిదంబరం దాఖలు చేసిన పిటిషన్​ను అత్యవసరంగా విచారించడానికి సర్వోన్నత న్యాయస్థానం నిరాకరించింది. మరోవైపు ఈడీ చిదంబరంపై లుక్​ అవుట్​ నోటీసు జారీ చేసింది. ఈ పరిణామాలతో ఆయన అరెస్టుపై సర్వత్రా ఉత్కంఠ నెలకొంది.

కేంద్ర మాజీ మంత్రి చిదంబరానికి సుప్రీంకోర్టులో చుక్కెదురైంది. ఆయన వేసిన పిటిషన్​ను అత్యవసరంగా విచారించడానికి సర్వోన్నత న్యాయస్థానం నిరాకరించింది.

పిటిషన్​లో లోపాలు

చిదంబరం తరపు న్యాయవాదులు వేసిన స్పెషల్​ లీవ్ పిటిషన్​లో లోపాలు ఉన్న కారణంగా సుప్రీంకోర్టు రిజిస్ట్రీ విచారణకు అనుమతించలేదు. కోర్టు విచారణ జాబితాలో లేనందున కేసు వాదనలు వినడం కుదరదని జస్టిస్ ఎన్​.వి.రమణ స్పష్టం చేశారు. ఫలితంగా చిదంబరం బెయిల్ కొనసాగింపు పిటిషన్​ ఇవాళ విచారణకు వచ్చే అవకాశాలు లేకుండా పోయాయి.

అరెస్టు తప్పదా?

విచారణ వాయిదా పడడం... చిదంబరానికి ఇబ్బంది కలిగించే అంశమే. ఈడీ లుక్​ అవుట్​ నోటీసు జారీ చేసిన నేపథ్యంలో ఆయన అరెస్టుపై సర్వత్రా ఉత్కంఠ నెలకొంది.

ఇదీ జరిగింది

2007లో చిదంబరం ఆర్థికమంత్రిగా ఉన్న సమయంలో... ఐఎన్​ఎక్స్​ మీడియా గ్రూపునకు రూ.305 కోట్ల విదేశీ నిధులు అందాయి. ఇందుకు విదేశీ పెట్టుబడుల ప్రోత్సాహక బోర్డు (ఎఫ్​ఐపీబీ) అనుమతి ఇచ్చే​ విషయంలో అవకతవకలు జరిగాయనే ఆరోపణలు వచ్చాయి. ఫలితంగా సీబీఐ 2017 మే 15న ఐఎన్​ఎక్స్​ మీడియాపై కేసు నమోదు చేసింది. ఆ తరువాత ఇదే మీడియా గ్రూపుపై 2018లో ఎన్​ఫోర్స్​మెంట్ డైరెక్టరేట్​ (ఈడీ) అక్రమ నగదు చలామణి కేసు నమోదు చేసింది.

ఐఎన్​ఎక్స్ మీడియా కేసులో అరెస్టు నుంచి రక్షణ కోరుతూ చిదంబరం దాఖలు చేసిన బెయిల్ పిటిషన్​ను మంగళవారం దిల్లీ హైకోర్టు తిరస్కరించింది. వెంటనే రంగంలోకి దిగిన సీబీఐ, ఈడీ అధికారులు ఆయన అరెస్టుకు రంగం సిద్ధం చేశారు. రెండుసార్లు చిదంబరం ఇంటికెళ్లినా ఆయన లేకపోవడం వల్ల వెనుదిరిగారు. రాత్రి సమయంలో ఆయన ఇంటికి నోటీసులు అంటించారు. వెంటనే తమ ముందు విచారణకు హాజరుకావాలని ఆదేశించారు. మంగళవారం సాయంత్రం అదృశ్యమైన చిదంబరం... సుప్రీంకోర్టు వేదికగా న్యాయపోరాటానికి ప్రయత్నిస్తున్నారు.

ఇదీ చూడండి: ఫేస్​బుక్​లో కొత్త ఫీచర్​... సమాచారం మరింత భద్రం