సమాజ్వాదీ పార్టీ ప్రధాన ప్రచారకర్తగా 'ములాయం'
సార్వత్రిక ఎన్నికల్లో గెలుపే లక్ష్యంగా సమాజ్వాదీ పార్టీ పావులు కదుపుతోంది. తాజాగా పార్టీ వ్యవస్థాపకుడు ములాయం సింగ్ యాదవ్ పేరును 'ప్రధాన ప్రచారకర్తల' జాబితాలో చేర్చింది.
శనివారం ఎన్నికల కమిషన్కు పంపించిన నలభై మంది పార్టీ ప్రధాన ప్రచారకర్తల జాబితాలో ములాయం సింగ్ యాదవ్ పేరు లేదు. ఇది రాజకీయ వర్గాల్లో తీవ్ర చర్చనీయాంశం అయింది. ఈ నేపథ్యంలో పార్టీ దిద్దుబాటు చర్యలు చేపట్టింది. ఆదివారం విడుదల చేసిన సవరించిన జాబితాలో ప్రథమ స్థానంలో ములాయం సింగ్ యాదవ్ పేరును చేర్చింది.
తాజా సవరణ జాబితాలో ములాయం సింగ్తో పాటు, పార్టీ అధ్యక్షుడు అఖిలేశ్ యాదవ్, సీనియర్ నేత రాం గోపాల్ యాదవ్, ఆజామ్ఖాన్, డింపుల్ యాదవ్, జయా బచ్చన్ తదితరులు ఉన్నారు.