దేశవ్యాప్తంగా లాక్డౌన్ పరిస్థితులపై కాంగ్రెస్ పాలిత రాష్ట్రాల ముఖ్యమంత్రులతో చర్చించింది పార్టీ అగ్రనాయకత్వం. వీడియో కాన్ఫరెన్స్ ద్వారా జరిగిన ఈ భేటీకి కాంగ్రెస్ అధ్యక్షురాలు సోనియాగాంధీ నేతృత్వం వహించారు. మాజీ ప్రధాని మన్మోహన్ సింగ్, రాహుల్ గాంధీ, చిదంబరం, ఆయా రాష్ట్రాల సీఎంలు సమీక్షలో పాల్గొన్నారు.
లాక్డౌన్ కొనసాగింపుపై కేంద్రం వైఖరిని ప్రశ్నించారు సోనియా.
'' మే 17 తర్వాత ఏంటి? ఎలా? లాక్డౌన్ను పొడిగించాలని భారత ప్రభుత్వం ఏ ప్రాతిపదికన నిర్ణయిస్తోంది.''
- సోనియా గాంధీ, కాంగ్రెస్ అధ్యక్షురాలు.
కేంద్రాన్ని అడగండి...
సోనియా గాంధీ వ్యాఖ్యలను ఉటంకిస్తూ.. లాక్డౌన్ తర్వాత పరిస్థితులు ఎలా ఉంటాయో అని అన్నారు మాజీ ప్రధాని మన్మోహన్ సింగ్. లాక్డౌన్ నుంచి బయటపడేందుకు కేంద్రం ఎలాంటి వ్యూహం అనుసరిస్తుందో ప్రధానిని అడగాలని సీఎంలను కోరారు.
''సోనియా గాంధీ ఇప్పటికే ఆ విషయం ప్రస్తావించారు. ముఖ్యమంత్రులు సమాలోచనలు చేయాలి. లాక్డౌన్ నుంచి పూర్తిగా బయటపడేందుకు.. కేంద్రం ఎలా ముందుకెళ్తుందో, వ్యూహాలేంటో మీరు తప్పక అడగాలి.''
- మన్మోహన్ సింగ్, మాజీ ప్రధాని.
''లాక్డౌన్ నుంచి ఎలా బయటపడాలి.. ఆర్థిక వ్యవస్థను ఎలా పునరుద్ధరించాలి'' అనే అంశాలపై రెండు కమిటీలను నియమించినట్లు తెలిపారు పంజాబ్ ముఖ్యమంత్రి అమరీందర్ సింగ్.
మంచి ఉద్దీపన ప్యాకేజీ ఇవ్వనంత వరకు.. కేంద్ర, రాష్ట్ర ప్రభుత్వాలు కోలుకోలేవని అన్నారు రాజస్థాన్ ముఖ్యమంత్రి అశోక్ గహ్లోత్. రాష్ట్రాలు.. తీవ్ర సంక్షోభ పరిస్థితులను ఎదుర్కొంటున్నాయని, కేంద్రం నుంచి తక్షణ సాయం కావాలని డిమాండ్ చేశారు ఛత్తీస్గఢ్ ముఖ్యమంత్రి భూపేష్ బఘేల్.
