ప్రజల కోసం కాంగ్రెస్ నేతలు ఉద్యమించాలి: సోనియా

ప్రజా సమస్యలపై పోరాడాలని కాంగ్రెస్​ నాయకులకు పిలుపునిచ్చారు ఆ పార్టీ అధ్యక్షురాలు సోనియా గాంధీ. ప్రస్తుతం ప్రజాస్వామ్యం కష్టకాలంలో ఉందని ఏఐసీసీ ప్రధాన కార్యదర్శులు, రాష్ట్రాల ఇన్​ఛార్జ్​ల సమావేశంలో వ్యాఖ్యానించారు.

దేశంలో ప్రజాస్వామ్యం అత్యంత దయనీయ పరిస్థితిలో ఉందని ఆందోళన వ్యక్తం చేశారు కాంగ్రెస్ అధ్యక్షురాలు సోనియా గాంధీ. ప్రజా సమస్యలపై పార్టీ నేతలందరూ పోరాడాలని పిలుపునిచ్చారు. ఏఐసీసీ ప్రధాన కార్యదర్శులు, రాష్ట్రాల ఇన్​ఛార్జ్​ల సమావేశంలో పార్టీ నేతలకు ఈ మేరకు సూచించారు సోనియా. ఈ విషయాన్ని కాంగ్రెస్ అధికార ప్రతినిధి రణ్​దీప్ సుర్జేవాలా ట్విట్టర్ వేదికగా వెల్లడించారు .

బిహార్ అసెంబ్లీ ఎన్నికలు, మధ్యప్రదేశ్​లో 18 శాసనసభ స్థానాలు సహా ఇతర రాష్ట్రాల్లో జరిగే ఉపఎన్నికలకు ముందు సోనియా గాంధీ అధ్యక్షతన కాంగ్రెస్​ ముఖ్య నాయకులు సమావేశం కావడం ప్రాధాన్యం సంతరించుకుంది. కేంద్రం తీసుకొచ్చిన వ్యవసాయ చట్టాలు, హాథ్రస్​లో దళిత యువతిపై హత్యాచార ఘటన, యూపీలో శాంతిభద్రతలు వంటి అంశాలను లేవనెత్తుతోంది కాంగ్రెస్. వ్యవసాయ చట్టాలకు వ్యతిరేకంగా దేశవ్యాప్తంగా ఆందోళనలు నిర్వహిస్తోంది.