సామాన్యుడి విద్యుత్​ బిల్లు రూ.కోటి.. చెల్లించకుంటే భూమి వేలం

విద్యుత్​ శాఖ సామాన్యులకు ముచ్చెమటలు పట్టిస్తూనే ఉంది. ఇష్టారీతిన బిల్లు ఇస్తూ విద్యుత్​ వాడకం అంటేనే దడపుట్టేలా చేస్తోంది. అందుకు తగ్గట్టుగానే ఇటీవల ఉత్తర్​ప్రదేశ్​లోని ఓ గిరిజన కుటుంబానికి ఏకంగా రూ. కోటి బిల్లు వచ్చింది. గడువులోపు కట్టకుంటే భూమిని వేలం వేస్తామని చెప్పడం ఆశాఖ అధికారుల నిర్లక్ష్యానికి పరాకాష్ఠ.

ఉత్తరప్రదేశ్​ సోన్​భద్ర జిల్లాలో గిరిజన కుటుంబాలకు షాకిచ్చింది విద్యుత్​ శాఖ. కనీసం బల్బు పెట్టుకోలేని స్థితిలో ఉన్న వారికి రూ.6 వేల నుంచి రూ.1 కోటి వరకు బిల్లులు వేస్తున్నారు. ఇదేంటని ప్రశ్నిస్తే.. గడువులోపు కట్టకపోతే భూములను వేలం వేస్తామని బెదిరిస్తున్నారు అధికారులు.

"విద్యుత్​ శాఖకు చెందిన అధికారులు నా ఆధార్​ కార్డు తీసుకొని సౌభాగ్య పథకం కింద నాకు విద్యుత్​ కనెక్షన్ ఇచ్చారు. అప్పటి నుంచి మాకు విద్యుత్​ సౌకర్యం ఉంది. ఏడాది గడిచిన తర్వాత బిల్లు రూ. 1,13,18,400 వచ్చింది. మా కుటుంబ సభ్యులంతా షాక్​ అయ్యాం. అప్పటి నుంచి నిత్యం అధికారుల చుట్టూ తిరుగుతున్నా. ఒక్కరు కూడా పట్టించుకోవడం లేదు. పైగా బిల్లు మొత్తం చెల్లించకుంటే నా భూమిని వేలం వేస్తామని అధికారులు బెదిరిస్తున్నారు. "

--- అమర్​నాథ్​, బాధితుడు, ఆరంగ్​ పాణి

కేంద్ర ప్రభుత్వం ప్రవేశపెట్టిన 'సౌభాగ్య ప్రధాన్ మంత్రి సహజ్​ బిజిలీ హర్​ ఘర్ యోజన' కింద గిరిజన కుటుంబాలకు విద్యుత్​ కనెక్షన్లు ఇచ్చారు అక్కడి అధికారులు. అయితే ఒక్క అమర్​నాథ్​ ఇంటిలోనే కాదు.. ఆ ప్రాంతంలో నివసిస్తున్న గిరిజన కుటుంబాల్లో 156 ఇళ్లకు అధిక మొత్తంలో బిల్లు వచ్చింది. మరో గ్రామానికి చెందిన దాసాయి రాము అనే వ్యక్తికి రూ.66,11,457​ బిల్లు వచ్చింది.

"బిల్లులను సరిదిద్దడానికి దుద్దీ విద్యుత్ పంపిణీ సబ్ డివిజన్ జూనియర్ ఇంజనీర్‌ను సంప్రదించా. అయితే బిల్లుల సేకరణకు ప్రైవేటు రంగ అధికారులు బాధ్యత వహిస్తున్నారని, అందువల్ల ఆయన సాయం చేయలేనని తేల్చి చెప్పారు."

--- కుదుశ్, కాంచన్ గ్రామ పెద్ద​

ఈ విషయంపై విద్యుత్ శాఖ, దుద్దీ జూనియర్ ఇంజనీర్ మనోజ్ కుమార్ స్పందించారు. పైనుంచి గందరగోళం జరిగిందని... వాళ్లే సరిదిద్దాల్సి ఉంటుందని తెలిపారు. తమ వంతు ప్రయత్నంగా విచారణ జరిపి బిల్లులను తగ్గించడానికి ప్రయత్నిస్తామని చెప్పారు.

ఇదీ చదవండి:సీఎం, డిప్యూటీ సీఎంకు హైకోర్టు నోటీసులు