పాక్ కాల్పుల్లో ఓ జవాను మృతి- ఇద్దరికి గాయాలు

నియంత్రణ రేఖ వెంబడి పాక్ సైన్యం జరిపిన కాల్పుల్లో ఓ జవాను ప్రాణాలు కోల్పోయారు. ఓ సైనిక అధికారి సహా మరో జవాను గాయపడ్డారు. పాక్ కాల్పులను భారత సైన్యం దీటుగా తిప్పికొట్టినట్లు అధికారులు తెలిపారు.

పాకిస్థాన్ సైన్యం మరోసారి కాల్పుల విరమణ ఒప్పందాన్ని ఉల్లంఘించింది. జమ్ము కశ్మీర్​ రాజౌరీ జిల్లాలో నియంత్రిణ రేఖ వెంబడి పాక్ జరిపిన కాల్పుల్లో ఓ ఆర్మీ జవాను మరణించినట్లు అధికారులు తెలిపారు. ఓ సైనికాధికారితో పాటు మరో జవాను గాయపడినట్లు వెల్లడించారు.

సుందర్బని సెక్టార్​లో పాక్ బలగాలు చేసిన కాల్పులను భారత సైన్యం దీటుగా తిప్పికొట్టిందని అధికారులు స్పష్టం చేశారు. 'చిన్న ఆయుధాలు, మోర్టార్ షెల్లింగులతో పాక్ సైన్యం కాల్పులు ప్రారంభించింది. ఇందులో కొంతమందికి గాయాలయ్యాయి.' అని ప్రాథమిక సమాచారం ఆధారంగా ఓ ఆర్మీ ప్రతినిధి వెల్లడించారు. అనంతరం.. ముగ్గురికి గాయాలు కాగా.. ఓ జవాను చికిత్స పొందుతూ మృతి చెందినట్లు తెలిపారు.

గాయపడిన సైనికాధికారితో పాటు మరో జవాను ప్రస్తుతం సైనిక ఆస్పత్రిలో చికిత్స పొందుతున్నారని అధికారులు వెల్లడించారు. పాక్​ వైపు కూడా ప్రాణనష్టం జరిగిందని పేర్కొన్నారు. అయితే దీనిపై పూర్తి సమాచారం లేదన్నారు.