ఉత్తర్ప్రదేశ్లో చిన్నపార్టీలే కీలకం "మత్స్యకారులే మా ప్రధాన ఓటు బ్యాంకు. కూటమి గెలుపునకు మా ఓట్లు ఎంతో కీలకం"
--నిషద్ పార్టీ
"12-15 సీట్లలో ప్రత్యక్షంగా, 30 నియోజకవర్గాల్లో పరోక్షంగా ఫలితాన్ని ప్రభావితం చేసేది కుర్మీ ఓటర్లే. మాకు 2 సీట్లే కేటాయించినా... కుర్మీ ఓట్లన్నీ మిత్రపక్షానికి బదిలీ అయ్యేలా చూస్తాం"
--అప్నాదళ్(ఎస్)
ఉత్తర్ప్రదేశ్లో ఇలాంటి ప్రకటనలు చేసే పార్టీలు చాలానే ఉన్నాయి. భాజపా, కాంగ్రెస్, ఎస్పీ, బీఎస్పీతో పోల్చితే... ఈ పార్టీలు ఎంతో చిన్నవి. అయినా.... ఫలితాన్ని ప్రభావితం చేయగలమంటూ పెద్ద పార్టీలతో పొత్తులు పెట్టుకుంటున్నాయి. కావాల్సిన స్థానాల కోసం పట్టుబడుతున్నాయి. మరికొన్ని చిన్నపార్టీలు మాత్రం సీట్ల పంపకాల్లో ఏకాభిప్రాయం కుదరక వేచిచూస్తున్నాయి.
కూటమితో నిషద్..
నిర్బల్ ఇండియన్ శోషిత్ హమారా ఆమ్ దళ్-నిషద్ పార్టీ.... యూపీలో ఎస్పీ-బీఎస్పీ-ఆర్ఎల్డీ కూటమితో జట్టుకట్టింది. నిషద్కు సమాజ్వాదీ పార్టీ రెండు లోక్సభ స్థానాలు ఇచ్చింది.
"ఒకస్థానంలో మా అభ్యర్థి ఎస్పీ గుర్తుపై పోటీ చేస్తారు. మరోస్థానంలో ఎస్పీ అభ్యర్థి మా పార్టీ గుర్తుపై బరిలో ఉంటారు. గోరఖ్పూర్ నుంచి ప్రవీణ్ నిషద్ పోటీ చేస్తారు. ఉప ఎన్నికల్లో మాదిరే ఇప్పుడూ అక్కడ భాజపాను ఓడిస్తాం."
-- సంజయ్ నిషద్, నిషద్ పార్టీ అధ్యక్షుడు
కమలంతోనే అప్నాదళ్
ఎన్డీఏ ప్రభుత్వంలో కేంద్రమంత్రిగా ఉన్న అనుప్రియా పటేల్ నేతృత్వంలోని చిన్న పార్టీ అప్నాదళ్(సోనేలాల్). ఆ పార్టీ యూపీలో లోక్సభ ఎన్నికల కోసం భాజపాతో పొత్తు కుదుర్చుకుంది. అప్నాదళ్(ఎస్)కు భాజపా రెండు సీట్లు కేటాయించింది.
"ఈ ఎన్నికల్లో తీవ్ర పోటీ ఉన్న చోట మా వల్ల వచ్చే ఓట్లే నిర్ణయాత్మకం అవుతాయి. రాష్ట్రవ్యాప్తంగా ఉండే కుర్మీ ఓటర్లు మా మద్దతుదారులే. ఇది భాజపాకు బాగా లాభిస్తుంది"
--అరవింద్ శర్మ, అప్నాదళ్(ఎస్) అధికార ప్రతినిధి
ఎస్బీఎస్పీ ఎదురుచూపులు
యూపీలో మరో చిన్న పార్టీ అయిన ఎస్బీఎస్పీ పొత్తు కోసం వేచిచూస్తోంది. భాజపా, మహాకూటమి, కాంగ్రెస్ల కోసం తలుపులు తెరిచే ఉంచింది. రాష్ట్రంలో మాత్రం ఈ పార్టీ భాజపాతో ఉంది. ఆ పార్టీ అధ్యక్షుడు ఓం ప్రకాశ్ రాజ్భర్... యోగి ఆదిత్యనాథ్ మంత్రివర్గంలో సభ్యుడు.
"మా పార్టీ దాదాపు 50స్థానాల్లో ఎన్నికలను ప్రభావితం చేయగలదు. సీట్ల కేటాయింపుపై సరైన హామీ ఇచ్చే వరకు భాజపాతో పొత్తు గురించి చెప్పలేం. మా పార్టీకి 5 స్థానాలు ఇవ్వాలని ఇప్పటికే భాజపాకు చెప్పాం. మా వల్ల వచ్చే ఓట్లు ఎంత విలువైనవో అన్ని పార్టీలకు తెలుసు "
-- అరవింద్ రాజ్భర్, ఎస్బీఎస్పీ ప్రధాన కార్యదర్శి
సందిగ్ధంలో పీస్ పార్టీ
కొన్ని నెలల వరకు ఎస్పీ-బీఎస్పీతో కలిసే ఉన్నామని సంకేతాలిచ్చిన పీస్ పార్టీ ఇప్పుడు సందిగ్ధంలో పడింది. మెరుగైన అవకాశం కోసం వేచిచూస్తోంది.
"కాంగ్రెస్, ఎస్పీ-బీఎస్పీ కూటమి మాతో కలిసి వస్తాయో లేదో తేల్చుకోవాలి. మా సమయాన్ని వారు వృథా చేస్తున్నారు. మేం ఇప్పటికే ఎన్నికలకు సిద్ధమయ్యాం. 50 నుంచి 80 స్థానాల్లో మా పార్టీ పోటీ చేస్తుంది."
-- మహ్మద్ అయూబ్, పీస్ పార్టీ అధ్యక్షుడు
ప్రియాంక రాకతో..
ప్రియాంక రాకతో సంప్రదాయ ఓట్లను కాంగ్రెస్ పార్టీ కాపాడుకోగలదని అభిప్రాయపడ్డారు జేఎన్యూ అధ్యాపకుడు, రాజకీయ విశ్లేషకుడు సంజయ్.కె.పాండే. అందుకే రాష్ట్రంలో త్రిముఖ పోరు తప్పదని, ఈ ఎన్నికల్లో చిన్నపార్టీలు కీలకపాత్ర పోషిస్తాయని విశ్లేషించారు.
" ప్రస్తుతమున్న పరిస్థితుల్లో చిన్నపార్టీల వల్ల వచ్చే ఓట్లే చాలా కీలకం కానున్నాయి"-- సంజయ్ పాండే
లోక్సభ ఎన్నికల్లో కాంగ్రెస్ లేకుండా పొత్తు కుదుర్చుకున్నాయి ఎస్పీ, బీఎస్పీ. ఉత్తరప్రదేశ్లోని 80లోక్సభ స్థానాల్లో 38స్థానాలను బీఎస్పీ, 37స్థానాలను ఎస్పీ పంచుకున్నాయి. ఆ తర్వాత కూటమిలోకి వచ్చిన ఆర్ఎల్డీకి ఒక సీటు ఇచ్చాయి. రాహుల్ గాంధీ, సోనియా గాంధీ కోసం రెండు స్థానాల్లో అభ్యర్థులను పోటీకి నిలపడం లేదు.
కాంగ్రెస్... చిన్నపార్టీలైన మహాన్దళ్, అప్నాదళ్(కృష్ణ పటేల్ వర్గం)తో పొత్తు పెట్టుకుంది.
