నన్నూ సిద్ధార్థలాగే వేధిస్తున్నారు: విజయ్​ మాల్యా

కెఫే కాఫీ డే యజమాని సిద్ధార్థ పరిస్థితే తానూ అనుభవించానని సంచలన వ్యాఖ్యలు చేశాడు పరారీలో ఉన్న ఆర్థిక నేరస్థుడు విజయ్​మాల్యా. ప్రభుత్వ వేధింపులకు సిద్ధార్థ ఉదంతమే ప్రత్యక్ష ఉదాహరణ అని ఆరోపించాడు.

కెఫే కాఫీ డే యజమాని, కర్ణాటక మాజీ సీఎం ఎస్‌.ఎం.కృష్ణ అల్లుడు వి.జి. సిద్ధార్థ మృతిపై పరారీలో ఉన్న ఆర్థిక నేరస్థుడు విజయ్ మాల్యా స్పందించాడు. సిద్ధార్థ ఉదంతమే ప్రభుత్వ యంత్రాంగం వేధింపులకు నిదర్శనమని ఆరోపించాడు. తనని కూడా అలాగే వేధిస్తున్నారని చెప్పుకొచ్చాడు.

విజయ్​ మాల్యా ట్వీట్

"నాకు వి.జి. సిద్ధార్థతో పరోక్ష సంబంధాలు ఉన్నాయి. మంచి వ్యక్తి. తెలివైన వ్యాపారవేత్త. తను రాసిన లేఖలోని అంశాలను చూసి నేను తీవ్ర నిరాశకు గురయ్యాను. ప్రభుత్వ ఏజెన్సీలు, బ్యాంకులు ఎవరినైనా నిరాశలోకి నెట్టగలవు. బకాయిలన్నీ తిరిగి చెల్లిస్తానని చెబుతున్నప్పటికీ.. నా విషయంలో వారెలా వ్యవహరిస్తున్నారో చూడండి. అదే పాశ్చాత్య దేశాల్లో అయితే.. అప్పులను తిరిగి చెల్లించేందుకు సాయం చేస్తారు. కానీ నా విషయంలో మాత్రం చెల్లించడానికి ఉన్న అన్ని ప్రత్యామ్నాయాలను అడ్డుకుంటున్నారు"

-విజయ్​ మాల్యా, కింగ్​ఫిషర్​ అధినేత

బ్యాంకులకు రూ.9 వేల కోట్ల అప్పు ఎగవేత కేసులో విజయ్‌ మాల్యా నిందితుడిగా ఉన్నాడు.

సిద్ధార్థ ఉదంతం

ఈ నెల 29న నేత్రావతి నదిపై నడుస్తూ కనిపించకుండా పోయిన వి.జి.సిద్ధార్థ మృతదేహం బుధవారం ఉదయం లభ్యమయింది. ఆయన రాసినట్లుగా పేర్కొంటున్న ఓ లేఖ మంగళవారం బయటకు వచ్చింది.

ఓ ప్రైవేట్‌ ఈక్విటీ సంస్థలోని భాగస్వాములు షేర్లను బైబ్యాక్‌ చేయమని తనని ఒత్తిడి చేస్తున్నారని అందులో పేర్కొన్నారు. ఆదాయపు పన్ను విభాగం మాజీ డీజీ నుంచి వేధింపులు కూడా ఎదురయ్యాయని తెలిపారు. మైండ్‌ట్రీ, కాఫీడేకి సంబంధించి లావాదేవీల వ్యవహారాలను నిలుపుదల చేసేందుకు షేర్లు జప్తు చేశారన్న ఆరోపణలు లేఖలో ఉన్నాయి.

దీనిపై స్పందించిన ఐటీ అధికారులు.. సిద్ధార్థ విషయంలో చట్ట ప్రకారమే వ్యవహరించామని తెలిపారు. అలాగే లేఖలో ఉన్న సిద్ధార్థ సంతకం, తమ వద్ద నమోదైన సంతకంతో పోలి లేదని అధికారులు వివరణ ఇచ్చారు.

ఇదీ చూడండి: విజయాల 'కాఫీ కింగ్'.. విషాదాంతపు మజిలీ