జమ్ముకశ్మీర్ షోపియాన్ ఎన్కౌంటర్ కేసు కీలక మలుపు తిరిగింది. జులై 18న జరిగిన వివాదాస్పద ఆపరేషన్లో సాయుధ దళాల ప్రత్యేక అధికారాల చట్టాన్ని ఉల్లంఘించి.. జవాన్లు వ్యవహరించారనేందుకు ప్రాథమిక ఆధారాలు లభించినట్లు భారత సైన్యం వెల్లడించింది. సంబంధిత సిబ్బందిపై క్రమశిక్షణా చర్యలు ప్రారంభించినట్లు తెలిపింది.
అసలు ఏమైంది?
జులై 18న దక్షిణ కశ్మీర్ షోపియాన్ జిల్లా అమ్షిపురా గ్రామంలో జరిగిన ఎన్కౌంటర్లో ముగ్గురు గుర్తు తెలియని ఉగ్రవాదులను మట్టుబెట్టినట్లు సైన్యం ప్రకటించింది. అయితే.. ఆ ముగ్గురు జమ్ములోని రాజౌరీ జిల్లాకు చెందినవారని, అమ్షిపురాలో తప్పిపోయారని సామాజిక మాధ్యమాల్లో పోస్టులు వెల్లువెత్తాయి. అమ్షిపురాలోని యాపిల్, వాల్నట్ తోటల్లో కూలీలుగా పనిచేసే ఆ ముగ్గురు కనిపించకుండా పోయారని వారి కుటుంబ సభ్యులు జులై 17న పోలీస్ స్టేషన్లో ఫిర్యాదు చేసినట్లు వెలుగులోకి రావడం చర్చనీయాంశమైంది.
ఈ పరిణామాల నేపథ్యంలో విచారణ జరిపింది సైన్యం. జులై 18న జరిగిన ఆపరేషన్ విషయంలో సుప్రీంకోర్టు ఆమోదించిన నిబంధనావళిని జవాన్లు ఉల్లంఘించారని గుర్తించింది. ఆ ముగ్గురికి ఉగ్రవాదంతో సంబంధం ఉందా లేదా? అనే కోణంలో పోలీసులు దర్యాప్తు సాగుతోందని, ఇంకా స్పష్టత రావాల్సి ఉందని చెప్పింది. అయితే.. బాధ్యులపై ఎలాంటి చర్యలు తీసుకుంటున్నారనేది సైన్యం వెల్లడించలేదు.
ఇదీ చదవండి:ముంబయిలో సిలిండర్ పేలుడు- భవనం ధ్వంసం
