దిల్లీ మాజీ సీఎం షీలా దీక్షిత్ ఇకలేరు

దిల్లీ మాజీ ముఖ్యమంత్రి షీలాదీక్షిత్​ ఇకలేరు. కొద్దిరోజులుగా అనారోగ్యంతో బాధపడుతున్న ఆమె.. దిల్లీలోని ఓ ఆస్పత్రిలో చికిత్స పొందుతూ తుదిశ్వాస విడిచారు.

దిల్లీ మాజీ ముఖ్యమంత్రి, కాంగ్రెస్​ సీనియర్​ నేత షీలా దీక్షిత్​ కన్నుమూశారు. దిల్లీలోని ఓ ఆస్పత్రిలో చికిత్స పొందుతూ తుదిశ్వాస విడిచారు. 81 ఏళ్ల షీలా దీక్షిత్... గతేడాది ఫ్రాన్స్​​లో హృదయ సంబంధిత శస్త్రచికిత్స చేయించుకున్నారు.

అనారోగ్య కారణాలతో కొన్ని రోజుల క్రితం దిల్లీలోని ఓ ప్రైవేటు ఆసుపత్రిలో చేరారు షీలా. ఈ రోజు మధ్యాహ్నం 3.15 గంటలకు గుండె పోటు వచ్చింది. వెంటిలేటర్​పై ఉంచి, వైద్యం అందించినా ఫలితం లేకపోయింది. 3.55 గంటలకు షీలా దీక్షిత్​ మరణించినట్లు వైద్యులు ప్రకటించారు.

దిల్లీ కాంగ్రెస్ అధ్యక్షురాలిగా పనిచేశారు షీలా. 1998-2013 మధ్యకాలంలో దిల్లీకి ముఖ్యమంత్రిగా మూడు పర్యాయాలు సేవలు అందించారు. 2014లో కేరళకు గవర్నర్​గా ఉన్నారు.

షీలా దీక్షిత్​ మరణంపై దేశంలోని ప్రముఖులు విచారం వ్యక్తం చేశారు. రాష్ట్రపతి రామ్​నాథ్​ కోవింద్, ప్రధాని నరేంద్రమోదీ, కాంగ్రెస్​ అధ్యక్షుడు రాహుల్​ గాంధీ సహా పార్టీ అగ్రనేతలు సంతాపం ప్రకటించారు.