భాజపా ప్రస్తుతం "ఏక వ్యక్తిస్వామ్యం- ఇద్దరు వ్యక్తుల సైన్యం" అన్నట్లు తయారైందని ఆ పార్టీ మాజీ నేత, సినీ నటుడు శత్రుఘ్న సిన్హా విమర్శించారు. భాజపాలో సొంత పార్టీ వ్యక్తులకు గౌరవం లేని పరిస్థితి ఏర్పడిందని ఆరోపించారు.
ఇటీవలే కాంగ్రెస్ అధ్యక్షుడు రాహుల్ గాంధీతో సమావేశమైన శత్రుఘ్న సిన్హా... నేడు ఆ పార్టీలో చేరారు. దిల్లీలో కాంగ్రెస్ ప్రధాన కార్యాలయంలో పార్టీ ప్రధాన కార్యదర్శి కేసీ వేణుగోపాల్, అధికార ప్రతినిధి రణ్దీప్ సుర్జేవాలా సమక్షంలో కండువా కప్పుకున్నారు.
"భాజపాలో ప్రజాస్వామ్యం క్రమక్రమంగా నియంతృత్వంలా తయారైంది. నేను చాలాసార్లు చెప్పా. అక్కడ ఏక వ్యక్తిస్వామ్యం, ఇద్దరు వ్యక్తులదే ఆధిపత్యం. సమష్టిగా నిర్ణయాలు తీసుకునే పద్ధతి అంతరించింది. భాజపాకు మార్గనిర్దేశకులైన దిగ్గజ నేతలను మార్గదర్శక్ మండల్లో చేర్చారు. ఇప్పటివరకు ఒక్క సమావేశం నిర్వహించలేదు."
-శత్రుఘ్న సిన్హా, కాంగ్రెస్ నేత