బంగాల్​ ఉద్రిక్తం: ఈసీ నిర్ణయంపై విపక్షాలు ధ్వజం

బంగాల్​లో ప్రచార సమయాన్ని కుదిస్తూ ఎన్నికల సంఘం తీసుకున్న నిర్ణయంపై తీవ్ర విమర్శలు చేసింది కాంగ్రెస్​.  ఈసీ నిర్ణయం వల్ల దేశంలో చీకటి రోజు నెలకొందన్నారు కాంగ్రెస్​ ప్రతినిధి రణ్​దీప్​ సింగ్​ సుర్జేవాలా.  మోదీ ర్యాలీలను అనుమతించడానికే నేటి రాత్రి 10 గంటల నుంచి నిషేధం అమలు చేయాలని నిర్ణయించారా అని ప్రశ్నించారు సీపీఎం ప్రధాన కార్యదర్శి సీతారాం ఏచూరి.

బంగాల్​లో నిర్ణీత సమయానికి ఒక రోజు ముందుగానే ప్రచారం ముగించాలన్న ఎన్నికల సంఘం నిర్ణయాన్ని కాంగ్రెస్​ పార్టీ తప్పుబట్టింది. ఈసీ తన విలువను కోల్పోతోందని ఆరోపించింది.

ఆర్టికల్​ 324ను ఉపయోగించి రాజ్యాంగానికి ఈసీద్రోహం చేసిందని విమర్శించారు కాంగ్రెస్​ అధికార ప్రతినిధి రణ్​దీప్​ సింగ్​ సుర్జేవాలా. ఎన్నికల సంఘం తన స్థాయిని నిలబెట్టుకోలేకపోయిందని ఆరోపించారు. ఈసీ నిర్ణయం వల్ల ప్రజాస్వామ్యంలో చీకటి రోజు ఏర్పడిందన్నారు సుర్జేవాలా.

ప్రధానమంత్రి నరేంద్ర మోదీ, అమిత్​ షాలపై 11 ఫిర్యాదులు చేస్తే ఇప్పటి వరకు ఈసీ ఎలాంటి చర్యలు చేపట్టలేదన్నారు. బంగాల్​లో హింసకు కారణమైన భాజపాపై చర్యలు చేపట్టడంలో ఎన్నికల సంఘం విఫలమైందన్నారు. మోదీ ర్యాలీకి అనుమతించి, ఇతరులపై నిషేధం విధించటమేంటని ప్రశ్నించారు.

మోదీ ర్యాలీలకు ప్రత్యేక సమయమా...

బంగాల్​లో​ నెలకొన్న పరిస్థితులపై సీపీఎం ప్రధానకార్యదర్శి సీతారాం ఏచూరి స్పందించారు. రాష్ట్రంలో గురువారం రాత్రి 10 నుంచి ఎన్నికల ప్రచారాలపై ఈసీ నిషేధం విధించడాన్ని తప్పుపట్టారు. మోదీ ర్యాలీలను అనుమతించడానికే ఆ సమయం నిర్ణయించారా? అని ప్రశ్నించారు.

ఇదీ చూడండి: 'మోదీ సర్కార్​ది బలం కాదు... అహంకారం'