హస్తినలో మృత్యు కేళి సాగిస్తున్న కరోనాను కట్టడి చేసేందుకు నేరుగా రంగంలోకి దిగారు కేంద్ర హోంమంత్రి అమిత్ షా. కేంద్రం, రాష్ట్ర ప్రభుత్వం, స్థానిక సంస్థలు సమన్వయంతో ముందుకు సాగి వైరస్ వ్యాప్తిని నియంత్రించేలా విస్తృత ప్రణాళికలు సిద్ధం చేశారు. తక్షణం చేపట్టాల్సిన చర్యలపై అధికారులకు దిశానిర్దేశం చేశారు.
వరుస భేటీలు
దిల్లీలో ప్రస్తుత పరిస్థితిపై విస్తృతంగా సమీక్షించారు షా. దిల్లీ ముఖ్యమంత్రి అరవింద్ కేజ్రీవాల్, లెఫ్టినెంట్ గవర్నర్ అనిల్ బైజల్, మేయర్లతో రెండు సార్లు సమావేశమయ్యారు. కరోనా కట్టడికి చేపట్టాల్సిన చర్యలపై చర్చించారు. వైరస్ను నిలువరించేందుకు దిల్లీ ప్రభుత్వానికి కేంద్రం అన్ని విధాలా సహకరిస్తుందని భరోసా ఇచ్చారు. ఈ సమావేశాల్లో కేంద్ర ఆరోగ్య మంత్రి హర్షవర్దన్ కూాాడా పాల్గొన్నారు.
పరీక్షల సామర్థ్యం రెట్టింపు..
దేశ రాజధానిలో కరోనా పరీక్షల సామర్థ్యాన్ని రెండు రోజుల్లో రెట్టింపు చేయనున్నట్లు సమావేశాల అనంతరం అమిత్ షా తెలిపారు. ఆ తర్వాత టెస్టుల సామర్థ్యాన్ని మూడు రెట్లకు పెంచుతామన్నారు. ప్రతి కంటైన్మెంట్ జోన్లో కరోనా టెస్టులు నిర్వహించనున్నట్లు వెల్లడించారు.
దిల్లీలో చేపట్టబోయే చర్యలు..
- కంటైన్మెంట్ జోన్లలోని ప్రతి పోలింగ్ స్టేషన్లో కరోనా టెస్టులు.
- హాట్స్పాట్లలో కాంటాక్ట్ ట్రేసింగ్ కోసం ఇంటింటికి ఆరోగ్య సర్వే.
- ఆస్పత్రులలో పడకల కొరత తీర్చేందుకు తక్షణమే వైద్య సదుపాయాలతో 500 రైల్వే బోగీల ఏర్పాటు.
- ప్రైవేటు ఆస్పత్రులలో 60శాతం పడకలు అందుబాటులో ఉండేలా చర్యలు.
- ప్రైవేటు ఆస్పత్రులో కరోనా పరీక్షలు, చికిత్సకు రేట్లు నిర్ణయించేందుకు వీకే పాల్ నేతృత్వంలో కమిటీ.
అఖిల పక్ష భేటీ...
దిల్లీలో కరోనా పరిస్థితిపై చర్చించేందుకు అఖిల పక్ష భేటీకీ పిలుపునిచ్చారు అమిత్ షా. సోమవారం జరిగే ఈ సమావేశంలో పాల్గొనేందుకు భాజపా, కాంగ్రెస్, ఆప్, బీఎస్పీలను ఆహ్వానించారు. మహమ్మారిని నిలువరించేందుకు తీసుకోవాల్సిన చర్యలపై చర్చించనున్నారు.
దిల్లీలో కరోనా బాధితుల సంఖ్య దాదాపు 39 వేలకు చేరుకుంది. ఇప్పటి వరకు 1200 మందికిపైగా ప్రాణాలు కోల్పోయారు.
