అడ్వాణీ, జోషీలతో అమిత్​ షా భేటీ

భాజపా సీనియర్ నేతలు ఎల్​కే. అడ్వాణీ, మురళీ మనోహర్​ జోషీలతో పార్టీ జాతీయ  అధ్యక్షుడు అమిత్​ షా నేడు సమావేశమయ్యారు. భాజపా వారికి ఈ ఎన్నికల్లో టికెట్లు కేటాయించని తర్వాత మొదటి సారి షా వారిని కలిశారు. భాజపా మేనిఫెస్టో విడుదల చేసిన రోజే వారితో భేటీ కావడం ప్రాధాన్యం సంతరించుకుంది.

భాజపా జాతీయ అధ్యక్షుడు అమిత్​ షా పార్టీ సీనియర్ నేతలు ఎల్​కే అడ్వాణీ, మురళీ మనోహర్​ జోషీలతో భేటీ అయ్యారు.

వారివారి నివాసాలకు వెళ్లి సమావేశమయ్యారు షా. ఎన్నో ఏళ్లుగా సీనియర్​ నేత ఎల్​.కే అడ్వాణీ ప్రాతినిధ్యం వహిస్తోన్నగుజరాత్​లోని గాంధీనగర్​ లోక్​ సభ స్థానం నుంచి ఈ సారి అమిత్​ షా బరిలో నిలిచారు. అందుకే ఆయనను మర్యాదపూర్వకంగా కలిశారని పార్టీ వర్గాల సమాచారం.

కాన్పూర్​​ ఎంపీగా ఉన్న జోషీని బరిలోంచి తప్పించింది భాజపా. ఆయన స్థానంలో సత్యదేవ్​ పచౌరి పోటీ చేస్తున్నారు.

ఈ నేపథ్యంలో పార్టీ అధిష్టానం తనను పోటీ నుంచి తప్పించినట్లు ఓ ప్రకటనలో తెలిపారు జోషీ.