నకిలీ టీఆర్​పీ కేసులో రిపబ్లిక్​ టీవీ ప్రతినిధి అరెస్ట్​

టీఆర్​పీ అవకతవకలకు సంబంధించి ముంబయి పోలీసులు మరో వ్యక్తిని అరెస్టు చేశారు. రిపబ్లిక్​ టీవీకి చెందిన డిస్ట్రిబ్యూషన్​ హెడ్​ ఘనశ్యామ్ సింగ్​​ను ఈ రోజు ఉదయం అదుపులోకి తీసుకున్నట్లు క్రైం బ్రాంచ్​ పోలీసులు తెలిపారు.

ఇటీవల వెలుగు చూసిన టెలివిజన్​ రేటింగ్స్​ పాయింట్స్​(టీఆర్​పీ) కుంభకోణంలో రిపబ్లిక్​ టీవీ డిస్ట్రిబ్యూషన్​ హెడ్​ ఘనశ్యామ్​ సింగ్​ను ముంబయి క్రైం బ్రాంచ్​ పోలీసులు అరెస్టు చేశారు. ఈ కేసును విచారిస్తున్న​ క్రైమ్‌ ఇంటెలిజెన్స్‌ యూనిట్‌ (సీఐయూ) ఇప్పటివరకు 11 మందిని అదుపులోకి తీసుకొని విచారణ చేపట్టగా... తాజా అరెస్టుతో ఆ సంఖ్య 12కు చేరింది. ఘనశ్యామ్​ను సీఐయూ పలు దఫాలుగా విచారించిందని అధికారులు వెల్లడించారు.

టీఆర్‌పీల విషయంలో కొన్నిఛానళ్లు మోసాలకు పాల్పడుతున్నాయని బ్రాడ్​కాస్ట్​ ఆడియన్స్ రీసెర్చ్​ కౌన్సిల్​(బార్క్​) ఇప్పటికే పలు మీడియా సంస్థలపై కేసులు నమోదు చేసింది. కొంతమందికి డబ్బులు ఇచ్చి... తమ ఛానళ్లు చూసేలా చేస్తున్నాయని ఆరోపణలు ఉన్నాయి.