దేశద్రోహం కేసులో ఆ ముగ్గురు విద్యార్థులు మళ్లీ అరెస్టు

పాకిస్థాన్​కు అనుకూలంగా నినాదాలు చేసిన ముగ్గురు ఇంజినీరింగ్ విద్యార్థులను కర్ణాటక పోలీసులు మరోసారి అరెస్టు చేశారు. వారిని శనివారమే అరెస్టు చేసిన పోలీసులు అనంతరం విడుదల చేశారు. ఈ విడుదలను వ్యతిరేకిస్తూ పలు అతివాద సంస్థలు హుబ్లీ పోలీస్ స్టేషన్ ఎదుట ఆందోళనలు నిర్వహించాయి. ఈ నేపథ్యంలో వారిని మళ్లీ అదుపులోకి తీసుకున్నారు పోలీసులు.

దేశద్రోహం ఆరోపణలు ఎదుర్కొంటున్న ముగ్గురు ఇంజినీరింగ్ విద్యార్థులను కర్ణాటక పోలీసులు మరోసారి అరెస్టు చేశారు. పుల్వామా ఘటన జరిగి ఏడాదైన సందర్భంగా పాకిస్థాన్​కు అనుకూలంగా నినాదాలు చేసిన వీరిని హుబ్లీ పోలీసులు గత శనివారమే అదుపులోకి తీసుకున్నారు. అనంతరం శిక్షా స్మృతి(కోడ్​ ఆఫ్ క్రిమినల్ ప్రొసీజర్) సెక్షన్-169 ప్రకారం పూచీకత్తుపై వదిలేశారు.

అయితే.. విద్యార్థుల విడుదలకు వ్యతిరేకంగా ఆ ప్రాంతంలో నిరసనలు వెల్లువెత్తాయి. పలు అతివాద సంస్థలు హుబ్లీ పోలీస్ స్టేషన్ ఎదుట ఆందోళన నిర్వహించాయి. ఈ నేపథ్యంలో వారిని మళ్లీ ఇవాళ అదుపులోకి తీసుకొని.. కోర్టు ముందు హాజరుపర్చారు. ప్రస్తుతం ముగ్గురూ జ్యుడీషియల్​ కస్టడీ రిమాండ్​లో ఉన్నారని వివరించారు హుబ్లీ-ధార్వాడ్​ పోలీస్​ కమిషనర్​ దిలీప్​.

ఆ రాష్ట్ర హోంమంత్రి బసవరాజ్ బొమ్మై సైతం ఈ కేసు గురించి పోలీసు అధికారులను ఆరా తీసినట్లు సమాచారం.

పాకిస్థాన్​కు అనుకూలంగా...

కశ్మీర్​కు చెందిన ఈ ముగ్గురు విద్యార్థులు కర్ణాటకలోని ఓ ప్రైవేటు ఇంజినీరింగ్​ కళాశాలలో చదువుకుంటున్నారు. పుల్వామాలో సీఆర్​పీఎఫ్​ జవాన్లపై ఉగ్ర దాడి జరిగి ఏడాదైన సందర్భంగా వీరు... పాకిస్థాన్​కు అనుకూలంగా నినాదాలు చేశారు. ఫేస్​బుక్​లో పాకిస్థాన్​కు​ అనుకూలంగా పోస్టులు పెట్టారు. ఫలితంగా వారిని దేశ ద్రోహం కేసులో ఫిబ్రవరి 15న కర్ణాటక పోలీసులు అదుపులోకి తీసుకున్నారు.

ఇదీ చదవండి:జమ్ముకశ్మీర్​ భద్రత కోసం ప్రత్యేక కమాండ్​!