ఉత్తర్ ప్రదేశ్లోని అయోధ్య జిల్లాలో సెక్షన్ 144 సెక్షన్ను విధించారు అధికారులు. ఐదుగురు కంటే ఎక్కువ మంది గుమిగూడకుండా ఆంక్షలు అమలు చేస్తున్నారు. రానున్న పండుగల దృష్ట్యా.. ఎలాంటి అవాంఛనీయ ఘటనలు జరగకుండా ఉండేందుకే అధికారులు ఈ నిర్ణయం తీసుకున్నారు.
అయోధ్యలో నిర్వహించే దీపోత్సవ కార్యక్రమంలో ఉత్తర్ప్రదేశ్ సీఎం యోగి ఆదిత్యనాథ్ పాల్గొంటారని జిల్లా మేజిస్ట్రేట్ అనూజ్ కుమార్ చెప్పారు. పండుగల మధ్యలోనే కొన్ని కీలక పరీక్షలు నిర్వహించాల్సి ఉందని వెల్లడించారు. ఆ సమయంలో శాంతిభద్రతల సమస్యలు తలెత్తకుండా ఈ నిబంధనలను విధించామని అన్నారు.
"అయోధ్యలో నవంబర్ 13న వివిధ కార్యక్రమాలు జరగనున్నాయి. రమాకాంత్ పార్క్లో రాముని పట్టాభిషేక వేడుకలు నిర్వహిస్తారు. అదే రోజు.. హెలికాప్టర్ నుంచి పూలవర్షం కురిపిస్తారు. సాయంత్రం సరయు హారతి కార్యక్రమం ఉంటుంది. రామ్లీలతో పాటు దీపోత్సవం కార్యక్రమం జరుగుతుంది. ఈ సాంస్కృతిక కార్యక్రమాల్లో శాంతిభద్రతలకు విఘాతం కలగకుండా.. ఉండేందుకే జిల్లా యంత్రాంగం ఈ నిబంధనలను విధించింది. "