'పీఎం కేర్స్​ నిధులపై సుప్రీం తీర్పు రాహుల్​కు చెంపపెట్టు'

పీఎం కేర్స్​ నిధులపై సుప్రీంకోర్టు ఇచ్చిన తీర్పు రాహుల్​ గాంధీ దుర్మార్గపు ఆలోచనలకు చెంపపెట్టు అని భాజపా అధ్యక్షుడు జేపీ నడ్డా ధ్వజమెత్తారు. దురుద్దేశ ప్రయత్నాలు ఇకనైనా మానుకోవాలని హితవు పలికారు. సుప్రీం తీర్పు అనంతరం వరుస ట్వీట్లు చేశారు.

పీఎం కేర్స్​ నిధులను ఎన్​డీఆర్​ఎఫ్​కు బదిలీ చేయాల్సిన అవసరం లేదని సుప్రీంకోర్టు ఇచ్చిన తీర్పు రాహుల్ గాంధీ దుర్మార్గపు ఆలోచనలకు, ఆయనకు వత్తాసు పలికే వారికి చెంపపెట్టు లాంటిదన్నారు భాజపా అధ్యక్షుడు జేపీ నడ్డా. కాంగ్రెస్, దాని అనుచరుల హానికర ప్రయత్నాలు విఫలమై వాస్తవమే గెలిచిందన్నారు. ఈ మేరకు వరుస ట్వీట్లు చేశారు.

"పీఎం కేర్స్ నిధులపై సుప్రీం తీర్పు.. రాహుల్, అద్దె కార్యకలాపాలు నిర్వహించే ఆయన మద్దతుదారులకు కోలుకోలేని దెబ్బ. పీఎం కేర్స్​కు విరాళాలిచ్చిన సాధారణ పౌరులంతా రాహుల్ తప్పుడు ప్రచారాలను తిరస్కరించారు. ప్రజల ద్వారా సేకరించిన పీఎంఎన్​ఆర్​ఎఫ్​ నిధులను కాంగ్రెస్​ కుటుంబ ట్రస్టులకు బదిలీ చేసుకుని దశాబ్దాలుగా వాడుకుంది. పీఎం కేర్స్​పై తప్పుడు ప్రచారం చేయాలనుకోవడం కాంగ్రెస్ పాపాలను కడగడానికి చేసిన ప్రయత్నమని దేశ ప్రజలందరికీ తెలుసు. "

-జేపీ నడ్డా ట్వీట్​

ఒక్క అవినీతి ఆరోపణ లేదు..

సుప్రీంతీర్పుపై న్యాయశాఖమంత్రి రవిశంకర్ ప్రసాద్​ కూడా స్పందించారు. పీఎం కేర్స్​ నిధుల నిర్వహణ చట్టపరంగా, పారదర్శకంగా ఉందన్నారు. తమ ప్రభుత్వం ఇప్పటి వరకు ఒక్క అవినీతి ఆరోపణ కూడా ఎదుర్కోలేదని గుర్తు చేశారు. విద్వేష ప్రసంగాలపై ఫేస్​బుక్​ సీఈఓకు కాంగ్రెస్​ లేఖ రాయడాన్ని విమర్శించారు రవిశంకర్​. గతంలో సోనియా గాంధీ 'ఆర్​ పార్ కీ​ లడాయి' అనడం, మోదీపై రాహుల్​ అభ్యంతరకర వ్యాఖ్యలు చేయడం ద్వేషపూరిత ప్రసంగాలు కావా? అని ప్రశ్నించారు.