'నిర్భయ' క్యురేటివ్​ పిటిషన్లపై 14న విచారణ

దిల్లీ నిర్భయ కేసులో దోషులు వినయ్​ కుమార్​, ముకేశ్​ కుమార్​లు దాఖలు చేసిన క్యురేటివ్​ పిటిషన్లపై ఈ నెల 14న విచారణ చేపట్టనుంది సర్వోన్నత న్యాయస్థానం. తమకు ఉరి శిక్షను నిలిపివేయాలంటూ.. నిందితులు ఈ వ్యాజ్యాలు దాఖలు చేశారు.

తమకు విధించిన మరణ శిక్షపై స్టే విధించాలని కోరుతూ నిర్భయ దోషులు దాఖలు చేసిన క్యురేటివ్​ పిటిషన్లపై ఈ నెల 14న సుప్రీం కోర్టు విచారణ జరపనుంది. జస్టిస్ ఎన్వీ రమణ నేతృత్వంలోని ఐదుగురు సభ్యుల ధర్మాసనం.... ఈనెల 14న మధ్యాహ్నం ఒంటి గంట 45 నిమిషాలకు ఈ వ్యాజ్యాలపై విచారణ చేపడుతుంది.

ఈ ధర్మాసనంలో జస్టిస్ ఎన్వీ రమణతో పాటు జస్టిస్ అరుణ్ మిశ్రా, జస్టిస్ నారిమన్, జస్టిస్ భానుమతి, జస్టిస్ అశోక్ భూషణ్‌ ఉన్నారు. నిర్భయ దోషుల్లో వినయ్ కుమార్​ శర్మ, ముకేశ్ కుమార్​లు తమకు విధించిన ఉరిశిక్షను నిలిపేయాలంటూ క్యురేటివ్ పిటిషన్లు దాఖలు చేశారు. న్యాయపరంగా తమకు ఉన్న చివరి అవకాశాన్ని వినియోగించుకున్నారు.

నిర్భయ దోషులకు విధించిన మరణశిక్షను ఈనెల 22న ఉదయం ఏడింటికి అమలు చేయాలంటూ ఇటీవలే దిల్లీ పాటియాలా హౌస్‌ కోర్టు డెత్​ వారెంట్‌ జారీ చేసింది.

ఇదీ చూడండి:'నిర్భయ' దోషులకు ఈనెల 22న ఉరి