'వీవీప్యాట్​లపై స్పష్టతనివ్వాలి'

వీవీప్యాట్​ల లెక్కింపుపై స్పష్టతనివ్వాలని ప్రధాన ఎన్నికల కమిషన్​కు సుప్రీం కోర్టు ఆదేశాలు జారీ చేసింది. ఈవీఎంల​లో అనుమానాలున్నాయన్న ప్రతిపక్షాల అభ్యర్థన మేరకు సర్వోన్నత న్యాయస్థానం ఈ ఆదేశాలిచ్చింది.

సార్వత్రిక ఎన్నికల్లో 50 శాతం ఓట్ల లెక్కింపు ప్రక్రియను 'ఓటర్ వెరిఫేయబుల్​ పేపర్​ ఆడిట్​ ట్రైల్' (వీవీప్యాట్)­ ద్వారా చేపట్టే అంశంపై ఎన్నికల కమిషన్​ స్పష్టతనివ్వాలని అత్యున్నత న్యాయస్థానం ఆదేశించింది. ​లోక్​సభ ఎన్నికల ఫలితాలు ప్రకటించే ముందు ప్రతి నియోజకవర్గంలో 50 శాతం వీవీప్యాట్​ స్లిప్పులు లెక్కించాలని కోరిన ప్రతిపక్షాల పిటిషన్​పై సుప్రీంకోర్టు విచారణ చేపట్టింది.

ఈ విషయంపై కోర్టుకు వివరాలు తెలిపేందుకు ఈసీ ఓ ప్రత్యేక అధికారిని నియమించాలని సుప్రీం ప్రధాన న్యాయమూర్తి జస్టిస్​ రంజన్ గొగొయి​, జస్టిస్​ దీపక్​ గుప్త, జస్టిస్​ సంజీవ్ ఖన్నాల నేతృత్వంలోని ధర్మాసనం స్పష్టం చేసింది. పిటిషన్​పై తదుపరి విచారణను ఈ నెల 25కు వాయిదా వేసింది సుప్రీం కోర్టు.

పిటిషన్​ దాఖలు చేసిన వారిలో ఆంధ్రప్రదేశ్​ ముఖ్యమంత్రి చంద్రబాబు నాయుడు, దిల్లీ సీఎం అరవింద్​ కేజ్రివాల్ సహా పలు ప్రధాన పార్టీల నేతలు ఉన్నారు.