సుప్రీం కోర్టు కొత్త రోస్టర్ను విడుదల చేసింది. ఈ రోస్టర్ ప్రకారం.. ప్రజాప్రయోజన వ్యాజ్యాలు, లెటర్ పిటిషన్లపై ప్రధాన న్యాయమూర్తి జస్టిస్ ఎన్ఏ బోబ్డేతో పాటు.. సీనియర్ న్యాయమూర్తులతో కూడిన ధర్మాసనం విచారణ చేపడుతుంది.
ధిక్కరణ, ఎన్నికలు, హెబియస్‌కార్పస్‌, సామాజిక న్యాయం, ప్రత్యక్ష-పరోక్ష పన్నులు తదితర కేసులను జస్టిస్ బోబ్డే చూస్తారు. వీటితో పాటూ విచారణ కమిషన్‌లు, కంపెనీ చట్టాలు, ‘ట్రాయ్‌’, ‘సెబీ’, భారతీయ రిజర్వు బ్యాంకు తదితర కేసులు కూడా ఆయన విచారణ పరిధిలోనే ఉన్నాయి.
త్రివిధ దళాలు జస్టిస్ ఎన్.వి.రమణ పరిధిలోకి...
జస్టిస్ ఎన్.వి.రమణ సారథ్యంలోని ధర్మాసనం త్రివిధ దళాలు, పారామిలిటరీ, నష్టపరిహారం, క్రిమినల్‌, సాధారణ సివిల్‌ అంశాలు, న్యాయాధికారులు, సుప్రీం, హైకోర్టులు, జిల్లా న్యాయస్థానాలు, ట్రైబ్యునళ్ల ఉద్యోగులకు సంబంధించిన కేసులను విచారిస్తుంది.
ఈ కేసులతో పాటు ప్రభుత్వ ప్రాంగణాల నుంచి ఖాళీ చేయించడానికి సంబంధించిన అంశాలనూ విచారిస్తుంది. ఆర్బిట్రేషన్‌ అంశాలను సవాలు చేస్తూ దాఖలయ్యే స్పెషల్‌ లీవ్‌ పిటిషన్లు, వాణిజ్యపరమైన లావాదేవీలు, సాగరచట్టాల పరిధిలోకి వచ్చే అంశాలకు సంబంధించిన కేసులను ధర్మాసనం వింటుంది.
