ఫ్రీ డేటా, అన్​లిమిటెడ్ కాల్స్ పిటిషన్​ తిరస్కరణ

లాక్​డౌన్​ సమయంలో ప్రజలకు ఉచిత డేటా, కాలింగ్​, డీటీహెచ్ సదుపాయాలు కల్పించాలని దాఖలైన పిటిషన్​ను సుప్రీంకోర్టు తిరస్కరించింది. ఎలాంటి వ్యాజ్యాలు దాఖలు చేస్తున్నారని అసహనం వ్యక్తం చేసింది.

ప్రజలందరికీ ఉచిత డేటా, అన్​లిమిటెడ్​ కాలింగ్, డీటీహెచ్​ సేవలు కల్పించేలా కేంద్రం, సంబంధిత అధికారులను ఆదేశించాలనే పిటిషన్​పై విచారణ చేపట్టబోమని తెలిపింది సుప్రీంకోర్టు. ఎలాంటి వ్యాజ్యాలు దాఖలు చేస్తున్నారని పిటిషనర్​పై అసహనం వ్యక్తం చేసింది. అత్యున్నత న్యాయస్థానం వ్యాఖ్యలతో తన పిటిషన్​ను ఉపసంహరించుకుంటానని చెప్పారు న్యాయవాది మనోహర్ ప్రతాప్.

కరోనా కట్టడికి మే 3వరకు పొడిగించిన లాక్​డౌన్ కారణంగా ప్రజలంతా మానసిక ఒత్తిడికి గురవుతున్నారని, ఫ్రీ కాలింగ్​, డీటీహెచ్ సదుపాయాలు కల్పిస్తే ఉపశమనం లభిస్తుందని పటిషన్​లో పేర్కొన్నారు ప్రతాప్​. వీడియో స్ట్రీమింగ్ వెబ్​సైట్లు కూడా వినియోగదారులకు ఉచిత సేవలు కల్పించాలని విన్నవించారు. ఉచిత సౌకర్యాలుంటే ప్రజలంతా, తమ కుటుంబ సభ్యులు శ్రేయోభిలాషులతో మాట్లాడటం వల్ల మానసిక ఒత్తిడి తగ్గుతుందని, ఇష్టమైన ఛానళ్లను చూడవచ్చని అభిప్రాయపడ్డారు.